( 12 )
و أنا قاعد في الميكروباص احيانا و الدنيا هاديه و مش سامع غير صوت العربية و هي ماشية على الطريق و السواق محترم نفسه كده و مش مشغل الكاسيت بتاعه تلاقي شخص كده طلع فجأه و قال بصوت عالي : أن الدنيا فانيه و يوم القيامة قادم قادم ... ماذا اعدت لأخرتك ؟ , هل تصلي ؟ هل تطيع ربك ؟ أنت على وشك الموت احنا ممكن نموت واحنا ماشين دلوقتي على الطريق هتعمل ايه و أنت واقف قدام ربنا ماذا سوف تقول له ؟ و يعد يعطيك في خطبة لا تختلف كثيرا ً عن خطبة الجمعة , في ناس كأنها و لا سمعه حاجة و ناس تانيه تبدأ تتكلم معاه و تسأله عن فتاوى في الدين و السواق يرفض ياخد من الراجل ده الأجرة و يقوله د أنت بركة أدعي لنا يا شيخ و هو طبعا جزالك الله خيرا يا بني و ربنا يهديك و يسترلك طريقك .
الموضوع ده بيحصل معايا كتير و مش مقتصر على رجاله لا فيه ستات كمان , من المواقف اللي اذكرهلهم راجل قاعد يتكلم ويدعي و يقرا قرأن و بعد ما خلص الراجل اللي قاعد جنبه قاله قولي يا شيخ أنا مراتي مغلباني و تعباني و مش عارف أعمل معاها ايه , أنا عارف أني مقصر في حقها و العيشه صعبة و فضل يشكيلوا كتير و يحكي له همومه , راح الراجل قاله : أضربها دينك بيقولك كده !! أنت راجل تعبان في شغلك و الست لازم تطيع جوزها !.
الراجل : ده رأيك يا فضيلت الشيخ الضرب هو الحل ؟!.
أه يا بني ضرب خفيف كده !.
ينهار مش باين له ألوان ابن عم بتنجان يضرب مين يا عم و دين ايه اللي بيقول كده !!! و أنت مين أصلا علشان تفتي و لا هي الفتوى للجميع يعني هي جت على اللي في الميكروباص ما التلفزيون مليان قنوات أفتى للصبح ؟ ربنا ينتقم منكوا يارب .
مره تانيه كنت حاطط الهاند فري بتاع الموبيل في ودني و بسمع أغاني أو حلقات برنامج مروة رخا لان الطريق من بيتي لحد الكليه طويل جدا و ممل فبحتاج حاجة تساليني و فجأه لقيت اللي جنبي راجل بدقن بيشيل السماعات من ودني و يقولي : يا بني حرام اللي أنت بتعمله ده !.
أنا : ليه هو أنا بعمل ايه ؟.
هو : بتسمع أغاني و الأغاني حرام ؟.
أنا : حرام ليه ؟ .
هو : يا بني أنت لسه صغير مش هتفهم و هما بيضحكوا عليك أنت و الشباب اللي زيك بالاغاني اللي يعزبوا بيها قلوبكوا دي ! .
أنا : طب مين اللي قال أن الأغاني حرام ؟.
هو : الشيوخ اللي بيطلعوا على القنوات الدينيه زي الناس و الرحمة.. أنت مبتسمعهمش ؟.
أنا : أه قناة الناس و الرحمة ( أيقنت أن مفيش فايده في الكلام معاها و أني صعب أوضح له وجهت نظري في الموضوع ده و كمان كنت عايز أقفل الحوار ده ) مبشفهمش بس هفكر في الكلام بتاعك ده .
هو : لا.. لازم تشفهم و تعرف دينك و ياريت يا بني تسيبك من الأغاني و الكلام الفاضي ده أنت و الشباب اللي زيك .
أنا : حاضر و أنا غير مقتنع بي ولا كلمه من اللي هو قاله .
( 13 )
يعني مش كفاية جشع سواقين الميكروباص و قرف الناس اللي راكبين يكمل الموضوع بالشحاته و النصب و ده ليها حاجات كتير منها
أبقى راكب في أمانة الله و قاعد و الاقي أتنين شباب طالعين و يقولوا : احنا اسفين أوي يا جماعة احنا مش جاين نشحت و لا حاجة بس في بنت صغيره عملت حادثة مع أهلها بالعربيه و أبوها و أمها ماتوا و هي في حاله خطر أوي في مستشفى الدمرداش و محتاجين بس فلوس علشان نيجيب لها دم من بنك الدم أرجوكوا يا جماعة ساعدونا ولو بأي حاجة بسيطة هتفرق معانا أوي دي بنت صغيره و بين الحياة و الموت , احنا بجد بجد متأسفين بس معلش محتاجين مساعدتكم و يفتح كيس بلاستك اسود يلف بيه في الميكروباص و الناس تبدأ تحط الفلوس في الكيس الصراحة أنا أول مره اتأثرت أوي و دفعت بس لما الموضوع أتكرر عرفت أنها لعبه و خصوصا أن نفس الشابين طلعوا بعد فترة في نفس الميكروباص اللي أنا راكب فيه و قالوا نفس القصة .
نوع تاني بقى و ده بيحصل كتير أوي تبقى قاعد في الميكروباص أو المترو برضوا و تلاقي ست منقبة طالعه أو بنت صغيره عندها 14 أو 15 سنة تقريبا و معاها ورق و تقعد توزعه على الركاب , الورق ده مكتوب فيه ساعدوني يا أهل الخير ولدي ميت و أمي ست مريضة بالقلب و السكر و الضغط و عندي 9 أخوات و أنا اكبرهم و عايشين في شقة بالأيجار و و أجرها 150 جنية و معاش أبويا 90 جنية و مصاريف علاج أمي 2000 جنية في الشهر أرجوكوا ساعدوني و تنتهي الورقه بأيه قرأنية , و ترجع تلف البنت تاني من الأول و تلم الورق من غير أي كلام و الناس يأما بتديها الورقه فاضية أو بتحط لها فيها فلوس .
( 14 )
شاحتين المواقف و خصوصا موقف العاشر و موقف حلوان ليهم طبيعة خاصة لانهم من نوعية العيال و السيتات و الرجاله العهات و رخمين رخامة عاملين زي الأمير المصري اللي بيلزق مبيطلعش , تلاقي الواد أو البنت من دول عنده 6 أو 10 سنين ماسك في أيده كيس مناديل و يبفضل يقولك مناديل يا استاذ مش عايز مناديل و النبي ساعدني أمي ميته و أبويا ميت و أنا عايش لوحد و النبي يأستاذ هات فلوس علشان أجيب أكل معيش فلوس , هات أي حاجة .. هات جنية و يقعد يعيط و يصرخ في وشك لما تبقى عايز تقتله .
أما الستات برضوا ماسكين مناديل و تفضل تقولك ساعدني ربنا يخليك , يارب تتجوز العروسة اللي قاعده جنبك دي و ربنا يرزقوا كده بالعيال و النبي ساعدني جوزي ميت و سايب لي 6 عيال بجري عليهم , لما تفشل في أقناعي تروح للبنت اللي جنبي خذي مني منديل يمكن يزعلك في الطريق تعيطي متلقيش منديل تمسحي بيه دموعك خذي مني منديل الحب و السعادة ( الشىء الكوميدي في الموضوع ده أن غالبا أنا والبنت اللي قاعده جنبي بنبقى منعرفش بعض أصلا) .
الرجاله تلاقي واحد عامل قسطرة و مسكها في أيده و ماشي عمال يلف على شبابيك الميكروبصات اللي وقفه و يقولك و هو بيموت ساعدني يا بني عندي غسيل كيليه و عامل عمليه في رجلي و عندي تحاليل و دواء مش عارف اجيبه , مره واحد صعب عليا و اديته فلوس و بعد ما مشي كان الميكروباص لسه واقف في الموقف ما مشيش ( موقف ميكروبصات حلوان ) , فببص لقيت الراجل ده واقف عند بتاع الموبيلات اللي في الموقف بينزل نغمات لموبيل Nokia N73 و الراجل بتاع الموبيلات عمال يسمع الشحات النغمات على الكمبيوتر و هو يرقص عليها ( صحيح الواحد مبيتعلمش ببلاش لا بالرنات ) .
من النوعية الغتيته برضوا تلاقي واحد ركيب الميكروباص و يبدأ الميكروباص كله يلم الأجرة و ده يقول أنا على باب الله ممكن حد من البهاوات اللي ركبين يدفع لي الأجرة و جزاء الله خير و يقوم واحد مطوع من اللي راكبين و يقوله أنا هدفعلك لحد كده كويس , بعد شويه تلاقي ابتدا يشحت من اللي جنبه و اللي قدامه و يقوله مكلتش من أمبارح و جميع أنواع الشحاتة , مش عارف ده ميكروباص و لا سوق يعني مش كتر خير الناس أنها دفعت له الأجره لا عايز يأخذ منهم فلوس كمان .
من النوعية اللي بصدفهم برضوا بس ده قبل ما أركب الميكروباص تلاقي واحد هاجم عليك فجأه و يقولك يا استاذ سلام عليكم ممكن بس 4.5 جنية تمن أجرة الميكروباص علشان أنا مسافر و سيل من الأسف شغال على دماغي بيه و المحفظة ضاعت مني برضوا أنا زي الأهبل صدقتهم مره و لما الموضوع أتكرر قلت لواحد فيهم ما تيجي تركب معايا أنا برضوا مسافر راح سابني و مشي .
( 15 )
الميكروباص ده عامل زي القهوة كده أفتح بس فيه موضوع و الكل يتكلم فيه أحداث المواضيع اللي شاغله الناس الأيام دي الضريبة العقارية , قاعدين ببتكروا طرق أزاي يتحايلوا بيها على الضريبة رغم أنهم لحد دلوقتي مش عارفين عنها حاجة غير أنهم لازم يسلموا الأقرارات قبل 31 ديسمبر ( ده قبل ما وزير المالية يطلع قرار بمدها ل 31 مارس ) و الناس بتقول أن الهدف من الضريبة دي أنهم يحصروا أملاك الشعب يعني يشوفوا الناس اللي معاهم 3 أو أربع شقق و يخدوا منهم ضريبة (طبعا الكلام ده غلط الوزير طلع في البيت بيتك و قال هناخد ضريبة على الشقة اللي تمنها 500 الف جنية و اكتر ) , واحد تاني من الركاب قال ( وطبعا بيفتي ) : هما قالوا أن اللي مجموع شققه يعدي 500 ألف جنية هيدفع ضريبة , راح واحد تاني مقترح و قال : يبقى الحل أن أنت متخليش غير شقة واحده بأسمك و أكتب بقيت الشقق بأسم مراتك و عيالك ( المصرين ميقفش قدمهم أي حاجة ماشين بمبدأ إحنا اللي دهنا الهوى دوكوا ) و بكده يبقى أنت معندكش غير شقة واحده .
فاصل ميكروباصي .... ( 4 ) : لافتات من داخل الميكروباص .
- أذكر الله ... لا اله الا الله .
- القبر يناديك .
- دعاء الركوب .
- صلي قبل أن يصلي عليك .
- بسم الله ما شاء الله .
- صلوا على النبي .
- ممنوع التدخين .
- أدفع الأجرة لو سمحت .... مع تحيات شركة ايديال .
- محمد أبو رامي لتركيب فرش السيارات .
- العالمية للزجاج .
- جدول معاد الدورات
المرج الساعة 6.30
موقف العاشر الساعة 6.45
جمال عبد الناصر الساعة 6.55
الجراج الساعة 7.10
العرب الساعة 7.20
الألف مسكن الساعة 7.30
اللي هيتأخر عن معاد الاتوبيس هيسيبه و يمشي برجاء المحافظة على التوقيتات مع تحيات رئيس شيؤن العاملين .
- البرنس طاهر .
- صور لفنانين ( شيرين و أصالة و جورج وسوف و مصطفى كامل ) .
- صور للسواق و عيال السواق و احيانا مزة السواق .
أحمد صبري
ليست هناك تعليقات:
إرسال تعليق