ميكروباصات مصر لازم تخش موسوعة جيبس و تبقى من عجائب الدنيا السبع و طالما الاهرمات طلعت من المنافسة يبقى الميكروباصات اوله , لو مركبتش ميكروباص في مصر يبقى أنت أكيد مش في مصر لانك لازم تشرب من نيلها و تركب ميكروباصتها و أنا من واقع خبرتي الطويله و المناضله في ركوب الميكروباص من أجل الحصول على كرسي فاضي و توصيله لمشواري العزيز قرارت أنقل اليكم مواقفي الطريفة و الظريفه و خبراتي مع الميكروباص .

الاثنين، 3 أكتوبر 2011

يا مكيروبصاتك يا مصر .... الجزء العاشر


                                                  ( 33 )
كنت راجع من مدينة نصر و ما صدقت لقيت ميكروباص بعد وقفه طويلة جدا من الانتظار و من اول ما ركبت الميكروباص السواق هات يكلام مع الركاب و على لسانه كلامه واحده ادي اللي خدناه من الثورة ايه بقى اللي خده السواق من الثورة ده اللي هنقلوا زي ما قالوا بالظبط 
" خدنا ايه من الثورة غير البهدله و الزحمة الأول مكنش فيه زحمة على الطريق دلوقتي الناس كلها في الشارع ما هو كل واحد يقولك حرية بقى و لازم انزل , من قال ان كل اللي ماتوا دول شهداء اللي ماتوا دول اغلبهم كانوا بلطجية بيسرقوا المحلات و طلع عليهم سكان المكان الشرفاء ( مش عارف كلمة شرفاء دي انا كنت بسمعها فين .. فين قبل كده ؟ ) و ضربوهم و خدوا الحاجات اللي سرقوها و فيه منهم اللي مات و هو بيسرق ده بزمتك يبقى شهيد ؟! , كلنا عارفين أن صفوت الشريف بتاع نسوان و زكريا عزمي حرامي هو و فتحي سرور و مبارك كان ماشي معاهم في السكة دي ايه دخل عياله بقى في الموضوع مش كده ظلم ليهم و خلاص ؟ ( تقريبا السواق مكنش بيشوف اجتماعات الحزب الوطني و لا بيشوف جمال مبارك مفجر ثورة الشباب ) , البلد بتاعتنا دي كانت عايزة صدام الراجل ده الوحيد اللي كان برنس في المنطقة العربية دي كان أسد ميهموش حد و عرفات برضوا كان برنس بس صدام لو كان مسك مصر كان حكامها صح الناس اللي كانوا ينفعوا لحكم مصر كلهم ماتوا خلاص لان زمانهم كان زمن البرنس ."
لا يوجد عندي تعليق على كلامه لان تعليقي كله شتايم تمنعها الرقابة دائما .
                                                 ( 34 )
كنت رايح مصر الجديدة و راكب ميكروباص من جسر السويس و الميكروباص فاضي و ماشي يحمل من السكة و عادي طلعت بنت وقعدت جنبي شوية و لقيتها بتسألني أنا شوفت حضرتك قبل كده ؟.
أنا : شوفتيني أنا ممكن بس أنا معرفش حضرتك ؟.
البنت : حضرتك مش عندك حساب على الفيس بوك و مشترك في كروب ( المقصود بها جروب ) أعز اصحاب ؟.
أنا : اه عندي حساب على الفيس بوك بس مش مشترك في الجروب ده .
البنت : و لا كروب احلام عمرنا ؟.
أنا : و لا كروب أحلام عمرنا مشترك في صفحة كلنا خالد سعيد و المجلس العسكري بس .
البنت : أصل فيه واحد شبهك موت بيكلمني على الشات بتاع الفيس بوك متعرفه على من الكروب اعز اصحاب و اسمه بياع المناديل فتكرتك انت هو .
أنا : لا والله للاسف مش بسرح بمنديل على الفيس بوك .
اللي تعاكس ولاد في الميكروباص تبقى البنت ايه شنكوته .
                                                ( 34 )
كنت راكب ميكروباص و قاعد جنبي راجل تقريبا في الاربيعينات  و أنا قاعد ضارب الجنز و التي شيرت و حظاظة علم مصر لقيت الراجل اللي جنبي بيسألني هو حضرتك ماسوني ؟
أنا : ايه ماسوني ! لا حضرتك خالص .
الراجل : قالي أمال لابس الحظاظة دي ليه أنا سمعت في برنامج أن كل اللي بيلبسها بيبقى ماسوني بس أنا مش عارف يعني ايه ماسوني دي فقلت اكيد أنت منهم و عارف .
أنا : حسبي الله و نعم الوكيل في قناة الفراعين و توفيق عكاشة و ابنه ظبايدر هما السبب في اللي بيحصلي ده , لا حضرتك انا لا ماسوني و لا حاجة دي حظاظة عادية عليها علم مصر و  شريها من محلات 2.5 .
الراجل : طب الحظاظة حرام و اقلعها أنا سمعت الشيخ على قناة الناس بيقول أن لو واحد قلع حد حظاظة يبقى كأنه أعتق رقبة من النار!.
أنا : هو حضرتك يا فراعين يا ناس هي الدش بتاع حضرتك مش بيلقط  ON TV  و أي قناة تانية ؟.
الراجل : أقلع يبني الحظاظة خليني أخد حسنات !.
أنا : لا يا حج أنا نازل مش قالع .
أشوف فيك يوم يا عكاشة على الي انت عملوا فينا .

فاصل ميكروباصي ...... الجمل المكتوبة في ظهر الميكروباص :
المضطر يركب الميكروباص .
مهما السمك كبر ابوعامر هو الحوت .
طال السهر يا لولو .
للبيع .. بعد ما استويت .
أبو تريكة .
الكبير كبير .. و النص نص .
العجلة فوق المسمار .. و ربك هو الستار
اللهم أعطى الناس كل ما يتمنوه لى .
و لا يهمنى  مادام ربنا بيحبنى .
معلش أصل الحلوة مخطوبة .
الخواجة هو الأساس .
بيحسدوني عليكي وانت سر عذابي .
ماتقوليش دى جاية بكام دى جاية بدهب المدام .
و ايه يعني المعلم مدلعني .
احذر السائق صعيدى .
تيت تيت خلصت فلوسى فى التقسيط .
بص عليه عروسه الدخليه .
أحمد صبري