ميكروباصات مصر لازم تخش موسوعة جيبس و تبقى من عجائب الدنيا السبع و طالما الاهرمات طلعت من المنافسة يبقى الميكروباصات اوله , لو مركبتش ميكروباص في مصر يبقى أنت أكيد مش في مصر لانك لازم تشرب من نيلها و تركب ميكروباصتها و أنا من واقع خبرتي الطويله و المناضله في ركوب الميكروباص من أجل الحصول على كرسي فاضي و توصيله لمشواري العزيز قرارت أنقل اليكم مواقفي الطريفة و الظريفه و خبراتي مع الميكروباص .

الأربعاء، 17 مارس 2010

يا ميكروبصاتك يا مصر ....... الجزء السادس


( 20 )

كنت راجع من حلوان و طريق الاتوستراد واقف مفيش حركة و السواق اخيرا منضف ودانه و مشغل حاجة نضيفة كان مشغل اليسا ( يسلام ايه الجو الشاعري ده ) انا عمري ما ركيبت ميكروباص مشغل حد غير طارق الشيخ اخيرا بقى في اليسا , بس الحلو ما يكملش و اذا بأحد الركاب بيزعق و ويقول يا اسطى اتطفي اللي انت مشغله ده حرام عليك الواحد تعبان !!. السواق راح موطي الكاسيت شوية , بردوا الراكب مسكتش وفضل يزعق لحد ما السواق طفى الكاسيت خالص , راح الراكب قال ايوه كده يا ريتك مشغل حاجة عدله !!.

من الواضح ان السواقين ودنهم نضفت بس الركاب و دنها صدت و اتعودت على اه يانا تعبانه , ياله قليل البخت بيلاقي العضم في الكرشه .

( 21 )

كنت راكب الميكروباص و قاعد في الكورسي اللي ورا السواق على طول و كل الركاب عمالين يبعتولي الاجرة علشان اوصلها للسواق و كأني التباع اللي جيه للسواق هدية , المهم في نص الطريق ركب اتنين و قاعدوا في الكرسي اللي ورايا و فضلوا يتعزموا على بعض مين اللي يدفع الأجره للتاني و طبعا هات يتخبيط في كتفي واحد مطلع فيهم خمسة جنية و التاني مطلع عشرة جنية و ده يخبط فيا و يقولي متاخدش منه حاجة خد وصل للسواق اتنين , و التاني عليا الطلاق ما أنت تدافع حاجة أنا اصلا عايز أفك خد يا استاذ العشرة دي و أديلوا الخمسة جنية بتاعتوا , و التاني يحلف و الله ما أنا واخد حاجة , بجد كنت عايز اضربهم واخد مهم هما الاتنين الفلوس فيها ايه لما كل واحد يدفع لنفسه الاجرة بدل القرف ده .

السواق يكتب يفطه جوا المكروباص و يقول تلم الاجره بالحساب الانجليزي .

( 22 )

من كام يوم كانت درجة الحرارة 38 و الناس مكنتش طايقه نفسها خالص و السواق كالعاده مش طايق نفسه اصلا امال هيطيق الركاب , السواق جيه لما العربية حملت و قال بصوا يا خونه كده قبل ما نطلع الدنيا حر و ان مش طايق نفسي اي حد هيفتح بقوا بكلمة في العربية و لا هيرغي مع اللي جنبه ينزل من دلوقتي مش نقصين وجع ماغ , المهم الناس قالو له اطلع يا أسطى نهارك ابيض أطلع احنا كمان هنموت من الحر , طلع السواق و طول ما هو ماشي عمال يسب و يلعن في السواقين اللي حوليه , الطريف بقى في السواق ده ان اللي كان بيقولوا يا اسطى بعد أذنك على أي جنب , يقولوا جنب ايه في مكان محدد تقولي انك عايز تنزل فيه مش أي جنب و الله ما أنت نازل غير لما تقولي على المكان اللي أنت عايزه بأسم المكان كمان و من قبلها بشوية كمان علشان اجهز نفسي و بعدين مش نقصه قرف , و فعلا مرضاش ينزل الراكب غير مع الراكب اللي كان نازل بعديه .

يا رب أنتقم من كل سواق ميكروباص مفتري و ظالم يا رب .

( 23 )

كنت راجع من القرية الذكية و مفيش عربيات بتروح هناك غير عربيات بيسموها عربيات الترام ( مش عارف هل اسمها ده كده صح و لا غلط ) و دي اوحش أنواع الميكروبصات , السواق بعد ما حمل العربية و حمل الكنبه اللي عملها وراه و اللي متشلش عيل صغير اصلا , مصمم اللى يركب ناس تقف على الباب و في اي مكان في الميكروباص و الطريق كمان واقف و كل شوية يقول حرام عليكوا ساعوا بعض دي كمان ناس تعبانه و عايزه تروح , فضل على كده لحد ما كان بيلف ملف واقف فيه امين شرطة و قاله محمل عدد زياده مخالفه كل الركاب فرحوا أوي و سقفوا و قالوا للسواق احسن , راح السواق قال و الله لانا موريكم و راح داخل في شوارع غريبة كده مكسره و بهدله و السكة فيها وقفه خالص و فضل يبهدل فينا لحد ما نزلنا ميدان الرمايه .

يارب كل ما يحمل السواق ده عدد زياده يتاخد مخلفه لحد ما يتحبس .

فاصل ميكروباصي ......... كلام داخل الميكروباص .

- مفيش 5 جنية اقدم من كده شوية ( سواق لراكب ) .

- خد 10 بدلها اهيه مقطعة ( راكب للسواق ) .

- و الله يا استاذ معدش سولار في البلد الواحد مبقاش عارف يمول منين بس ؟ ( سواق لراكب جنب منه ) .

- لسه فيه واحد مدفعش وراه ( السواق للركاب ) .

- الأجره موحده يا حضرات ( السواق للركاب ) .

- ماشي صلاح سالم مش همشي اتوستراد ( سواق بيغير طريقة ) .

- سكة يا بيه كده معلش جوه علشان اخوك يركب برضوا هو كمان تعبان و عايز يروح ( سواق لواحد واقف في الطرقه ) .

- قبل الكوبري معاك يا اسطى ( راكب لسواق ) .

- أول الكوبري ممنوع علشان في عسكري واقف على أوله ( سواق لراكب ) .

- يا جماعة اللي معاه عيل صغير بعد أذنه يشيلوا و يحطوا على رجله .

- على جنب يا اسطى ( راكب للسواق ) .

- هنا كده يا استاذ ( السواق للراكب ) .

- اه عند الياقطة اللي هناك دي ( الراكب للسواق ) .

- و الله يا جماعة العربيه عليها اقساط و المخلفات ما بترحمش ( السواق للركاب ) .

- ربنا يستر طريقك يا أسطى ( الركاب للسواق ) .

- ربنا ينتقم منهم يا بني و يوقفلك ولاد الحلال اللي زيك كده ( سواق هيوصل الست للمكان اللي هي عيزاه و بتاع الكارته مرخم عليه ) .

- خناقة في الميكروباص بين السواق و الراكب .

- أيه يا أسطى مش قلت لك على جنب .

- طيب يابيه مسمعتش .

- أنت أطرش ولا ايه ؟ .

- ليه الغلط يا افندي .

- انا اغلط زي ما انا عاوز , أنا أشتريك و أشتري عربيتك دي .

- خلاص يا جماعه نهاركوا ابيض انزل معلش بقى يا استاذ حق علينا( الركاب تتدخل )

أحمد صبري