( 1 )
كنت راجع من مدينة نصر وراكب ميكروباص لموقف العاشر والدنيا ماشيه عادي و موبيل واحد من الركاب رن راح السواق ما صرخ بصوت عالي الاستاذ اللي موبيله بيرن يا يقفله يا يرد أنا مبحبش أسمع صوت الموبيل في الميكروباص بتاعي , الراكب ياعيني اتخض و قال هو بيزعق ليه الراجل ده و رد على التليفون , شويه و كان الميكروباص في الطريق الاتوستوراد الحته اللي بين النادي الأهلي و الشيراتون المكان ده صحرا و كان في موبيل راكب تاني رن راح السواق موقف الميكروباص و حالف انه مش طالع غير لما الركاب يعملوا موبيلتهم SILENT او يقفلوها خالص و كان في واحد حاطط هاند فري في ودنه , قاله لو سمحت يا كابتن شيل السماعات من ودنك الحاجات دي متشتغلش في عربيتي لانها بتجيب الفقر و مرداش يتحرك غير لما الواد شال السمعات و أطمن ان مفيش موبيل هيرن تاني في الميكروباص .
( 2 )
الباقي في أي ميكروباص ده شىء مفقود لازم صوتك يتنبح علشان ترجع الباقي يعني كل شوية ( واحد من العشرة يا اوسطى , يا أسطى أنا نازل المحطة الجاية لو سمحت الباقي ) و يكون رده في منتهى البرود ( حاضر معيش فكه أعملك ايه يعني , فلوسك اهيه يا بيه و أتصرف أنت و يفضل ينادي في الركاب محدش معاه فكة 10 او 5 حتى ) الموقف الاغرب بقى كنت دافع 20 جنية و الأجرة جنية وربع و اديت الفلوس للتباع و كل شويه اسئله على الباقي يقولي حاضر لما يجيلي فكة , لحد ما نزل التباع في حته و السواق مشي و سابه و كنت خلاص قربت أنزل بقول للسواق : يا أسطى لو سمحت ليا باقي 20 جنية .
قال : حضرتك راكب منين .
قولت : من الف مسكن .
قال : بص الصراحة الواد اللي معايا خد الفلوس و نزل راح يجيب فطار هو أنت حضرتك ما قولتلوش ليه قبل ما ينزل .
قولت : و أنا أعرف منين يا أسطى أنه نزل ما هو عامل زي القرد عمال يتنطط في الميكروباص و الشارع طول الطريق و كل ما أسئله على الباقي يقولي معيش فكة .
قال : معلش يبقى أنت هتصبر معايا ربع ساعة كده عقبال لما الواد يجيب الفطار و يجي لي على الموقف !! .
( 3 )
الكوينات دي اكتر عمله مكروها عند الشعب المصري أدي لأي حد فيهم جينه و لا 50 قرش كوين يرجعهالك و يقولك مفيش ورق, انما داخل الميكروبص ليها وضع تاني الراكب و السواق بيحولوا يتخلصوا منها بأسرع وقت انت تدي السواق الاجرة كوينات و هو يرجعلك الباقي بردوا كوين انا مره اخذت باقي 10 جنيه كوينات و كان اغلبها 50 قرش و الاجرة جنيه كنت ماشي بشخلل بيهم في جيبي و مضيع لي 3 جنيه كده منهم , اما الموقف بقى اللي حصل على الكوينات كنت في الشيراتون و راكب مكيروباص و ركب واحد و دفع 5 جنيه و السواق رجع له الباقي كوينات و ده اتعصب و زعق و قاله يا عم ايه الفضة اللي انت مرجعهالي دي انا من الشرقية و الفضة دي مبتمشيش عندنا ( مش عارف الشرقية دي بلد تانيه غير مصر بتتعامل بالدولار مثلا ! ) .
السواق قاله : و انا اعملك ايه هي دي الفلوس الفكة اللي معايا لو مش عجبك هتهوم و أنزل
قاله : لا انا مش نازل و انت هتجيب الباقي ورق .
فضلوا يتخنقوا يمكن نص ساعة و السواق مش عايز يمش غير لما الاستاذ ده ينزل و ما تحركش غير لما واحد من الركاب اتكرم و فك للاستاذ الخمسة جنية فلوس ورق .
( 4 )
( صدقني مش بحرق دمك بالعكس ده أنا شايل همك و تعبني و تعبك على الفاضي كفي نفسك أنا عودت دموعي ما متمسحهاش اللى أديا , كفي نفسك د أنا لو راحتي في حضنك يبقى اهون الموت عليا ) .
ده جزء من اغنية اكتر مطرب بكره في حياتي طارق الشيخ معاد نزول الالبوم بتاعه بالنسبه لسواقين الميكروباص هو العيد الوطني للميكروباص لازم جميع السواقين يشغلوا طارق الشيخ , د أنا مره كنت رايح مدينة نصر و راكب ميكروباص من بيتي لحد اول عباس طول الطريق السواق بيسمعني طارق الشيخ و نزلت و أغنية دقيقة حداد شغاله و ركبت ميكروباص تاني من اول عباس كان مشغل نفس الاغنية ( و دي تيجي لازم اسمع بقيت الشريط ) .
بل طارق الشيخ يعتبر مقبول عن الاغاني التانية بالذات اغنية اه يانا تعبانه و لا اغنية الستات اربعه في اربعه كله كوم و لما تسمع شريط كله متسجل من فرح و تفضل تسمع الراجل و هو بينقط ( و نشكر المعلم عبده اللي شرفنا و كمان شعبولا اللي بيغني في فرحنا و نشكر العريس علشان اتجوز العروسه و نشكر الاستاذ محسن علشان ده المتعلم الوحيد في فرحنا و نشكر بقى .......... و سمعني احلاى زغروطه للفلوس اللي انا بدفعه ) و الله بنزل من الميكروباص و الصداع هيفرتك دماغي .
المشكلة ان مفيش حاجة بـتأثر معاهم يعني مهما زعقت و شخط علشان يقفل او يوطي حتى .. ابدا لازم تسمع , طب يا أسطى بعد اذنك هرد على التليفون ممكن بس توطي الصوت شويه ابدا انزل اتكلم في الشارع و لما تخلص أبقى اركب
و اه ياني ياني ياني مش هركب ميكروباص تاني و هدور وهدور على توك توك .
فاصل ميكروباصي.... أشهر جمل للتباع :
- كل واحد يحضر اجرته في ايده كده يا حضرات لو سمحت و يارب اللي يزوغ أمه تتطلق .
- كعب عالي معاك يا أسطى ( قصده ان في ست هتنزل وقف الميكروباص ) .
- عوم الاستاذ يا فتحي ( هدي السرعه و الاستاذ هينط من الميكروباص ) .
- العربيه فاضيه جوه يا حضرات كل واحد يخش عجله كده جوه .
- هات الربع ده يقصد الزبون اللي في الشارع .
- حد عايز فكة 5 – 10 – 20 .
- حد ليه بقاي , حد ركب ونسي يدفع , و النبي ياجماعة اللي طلع ورا وما دفعش .
- باقي اتنين من العشرة ورا .
- معاك ربع وتاخد نص .
- يا اسطى الاجره من هنا لحد الاف مسكن بكام يا اسطى علشان الاستاذ مش عايز يدفع غير 75 قرش .
أحمد صبري
ليست هناك تعليقات:
إرسال تعليق