ميكروباصات مصر لازم تخش موسوعة جيبس و تبقى من عجائب الدنيا السبع و طالما الاهرمات طلعت من المنافسة يبقى الميكروباصات اوله , لو مركبتش ميكروباص في مصر يبقى أنت أكيد مش في مصر لانك لازم تشرب من نيلها و تركب ميكروباصتها و أنا من واقع خبرتي الطويله و المناضله في ركوب الميكروباص من أجل الحصول على كرسي فاضي و توصيله لمشواري العزيز قرارت أنقل اليكم مواقفي الطريفة و الظريفه و خبراتي مع الميكروباص .

السبت، 4 ديسمبر 2010

حكاية ملازم مكتبات الكلية


صديقي الطلاب المستجد طبعا بعد ما ربنا كرمك و دخلت الجامعه و حضرت محضراتك و لقيت ان امتحانات الترم قربت و انت مش لاقي ورق تذاكر منه بعد ما تكون اتلسعت في امتحان الميد ترم لانك ذاكرت من المحضرات اللي انت بتكتبها و ملقيتش جاي منها غير سؤال واحد وبعد نصائح الطلاب القدمى لك بأنك متذاكرش غير من المحضرات و كتاب الدكتور لانه هو اللي بيجي منه الامتحان و انت طبعا متعود على ورق الدروس بتاع ثانوي , في الوقت ده يجي دور المكتبات المحيطة بالكليه ( اصلها مش فتحه علشان تصورلك ورقتين من كشكول المحضرات و لا تبيعلك قلم جاف ولا مسطره لأ دي ليها هدف اسمى من كده بكتير و هو انها تسعدك في دخول الامتحان و النجاح كمان ازاي ؟ . هو ده بقى موضوعنا .

ورق المكتبات ده بيجي منين ؟ .

من بعد شهر من بدأ الدراسه تلاقي طول ما انت ماشي جنب المكتبات يفط متعلقه عن ورق لسنه اولى و تانيه لحد اخر سنه عندك في الكلية و في كل المواد و تلاقي كمان كتبلك يوجد محاضرات و سكاشن مادة الرياضة مثلا و هكذا , طب الورق ده مصدره ايه ؟ . هقولك ما انا بقيت خبره خمس سنين تعامل معاهم , بص يا سيدي

الورق ده ياورق كورسات بتاع الطلبه اللي بتاخد كورسات مع المعيدين و المكتبات دي بتخده تصوره و تبيعه للطلبه و ده يعتبر احسن ورق ممكن تشتريه من المكتبه , المكتبات بتجيب ورق الكورسات ده منين ؟ , بص يا سيدي المكتبات بتجيب الورق ده يأما من الطلاب اللي بياخدوا الكورس عن طريق انك انت مثلا بتاخد كورس في الفيزياء و صحبك قالك ما تجبلي الورق علشان اصوره وراح يصوره في المكتبه عالطول تلاقي المكتبه واخده نسخها لنفسها و تقول لصحبك نسختك المره دي علينا بس انت كل ما تعوز تصور حاجة هتها و احنا نصورهلك مجانا و الكل ياستفيد طبعا و الورق طالما نزل في مكتبه كل المكاتب عالطول ينزل فيها زي النت عمرك شوفت فيلم تزل على موقع و مانزلش على كل المواقع هو نفس النظام بالظبط .

المعيدين يبيعوا الورق للمكتابات و ياخدوا نسبه ( هما بيقولوا طالما كده كده الورق هينزل المكتبه طب ما ابيعه انا وا ستفاد و النظام ده دايما متبع في كل الكليات بس مشهور اوي في تجارة و حقوق و اداب الكليات النظري )

قال لي معيد في كليه علوم قسم رياضه عن تجربة مع المكتابات : انا عملت انا و معيد معايا في نفس القسم ملازمة معمل و نزلناها للطلبه في المكتابات و بلغنا الطلبه و كل الطلبه اشتروها و احنا كسبنا 150 جنيه من 10 ورقات .

لو مش معيد بيكون طالب كان في الكليه و خلص و كان شاطر جدا في ماده او اتنين و مذاكر الدكاتره بتعهم اوي وعارف الاسئله بتعتهم كويس بيقوم عامل للماده ورق و ينزلوا في المكتابات و يعلن عن نفسه لو حد عايز حصص شرح , حصص مراجعه , حصص منهج مكسف و بتبقى ارخص من حصص المعيدين ( لو المعيد بيدي الكورس ب 500 هو يديه 400 لو المعيد بيدي الحصه ب 50 هو يديها ب 35 و هكذا ) و ميزته ان العدد بيبقى قليل , انا كان ليا تجربه مع واحد منهم كنت باخد معاه كورس ( أخذت الماده مع المعيد في الترم الاول و نجحت بالعافيه و الترم التاني أخذت الماده معاه وجبت جيد و كنا اربعه في الكورس و الباقي جاب امتياز و جيدا جدا ) اما العدد مع المعيد بيبقى من 15 ل 18 واحد , بس نصيحه مني ده اخر شخص تلجأله لانه بيكون بعيد عن المنهج يعني مش عارف الدكتور لاغى ايه ولا ضايف ايه في المنهج لازم انت كل حصه تقوله الدكتور قال كذا في المحضرة و لاغى الجزء ده .

او صاحب المكتبه ينشن على ماده نظري في كليه زي كليات الهندسة او الطب اللي لازم كل سنه يخدوا ماده ملهاش معنى و يجيب شخص يكون بيعرف انجليزي كويس يروح ماسك كتاب الماده و يجيب من طالب يكون هو مصحبه محضرات الدكتور , الشخص ده يترجمله كام صفحة بالعربي على شويه المحاضرات و ينزلهم في المكتبه للطلبه هنا بيبقى في اختلاف بين ورق مكتبه و التانيه علشان كل واحد بيجيب شخص غير التاني و ده اعلى ورق بيحقق مبيعات و بيحقق نسب سقوط للطلبه في الماده عاليه جدا , لان الماده دي بيبقى الطالب مبيعرفش عنها حاجة طول السنة و عنده يومين قبل الامتحان فبيبقى عايز حاجة تلخص معاه بسرعه .

أنا كان ليا تجربة في الموضوع ده كنت في أعدادي هندسة و كان عندي مادة انجليزي و الكتاب بتاعها 600 صفحة و كان عليها 50 درجة فكنت سيبها للاخر و قبل الامتحان أشتريت الملزمة المصونة من المكتبة كانت عبارة عن 3 صفحات كلمات و صفحتين grammar و 3 صفحات مواقف و بس , مسكت الملزمة قبل الامتحان لقيتها هابله حاسس انه منهج ابتدائي قلت اشطة ده انجليزي و هيعدي و دخلت الامتحان لولا القدر و شوية الانجليزي اللي طالع بيهم من ثانوي كنت شيلت المادة و أكتشفت بعد كده من صديق ليا ساكن جنب المكتبة , أن اللي عمل الملزمة مدرسة 4 ابتدائي بتيدي بنت صاحب المكتبة درس و صاحب المكتبة أخد من صديقي الكتاب قبل الامتحان و أداه للمدرسة و قالها اعملي لي ملازمة للعيال دول ابعها لهم ليلة الامتحان .

واحد من الدحاحين اوي أوائل الدفعه او شخص يكون بيعرف يلخص و شاطر اوي يمسك الماده يلخصها في ملزمة و يكتب على الاجزاء من المنهج مهمه و يعمل الورق س ج و يضبطة كده يروح على طول رايح على اي مكتبه و يقول لها : دكتور عبد الفتاح ( اي اسم يجي في دماغه و مش لازم يكون في الكليه ) بيقولك ده ورق الماده كذا صوره نزله للطلبه وهات 100 جنيه من تحت الحساب هو على طول اول ما بيشوف الورق ريقه بيجري و يديله الفلوس و ينزله ( واحد صحبي عمل الموضوع ده مره و خد 200 جنيه و كل الدفعه اشترت الورق ) .

الحل الاخير اللي بتلجاله المكتبه لما يكون خلاص مش عارفه تجيب ورق للماده دي و الماده بيتاخد فيها كورسات ( لان المعيدين بينبهوا على الطلبه ان الورق ما يرحش لحد و ما ترحش بيه الكليه علشان الدكتور لو شافك بيه هيسقطك و أنا همشيك من الكورس , بيضحط على الطالب علشان لسه جديد و ما يعرفش حاجة ) بتبعت طالب هي بتثق فيه اوي ياخد الكورس و تاخد الورق تبيعه .

موقف الدكاترة من الورق ده ايه ؟ .

اوعى تكون فاكر ان الدكاتره هتعدي الموضوع ده بالساهل و انهم مش هيشاركوا فيه , و انك تفضيها طول السنه صيايعه و متحدرش و تشتري الورق و تخش تجيب امتيازات او حتى جيد لا انسى , الدكاتره اصيع منك يا معلم , غالبا بيكون الدكتور حاقد على المعيد علشان بيدي كورسات و كده بيجي قبل الأمتحانات و ينزل يلم كل الورق المتعلق بالمادة و يشوف فيه ايه و يبعد عنه خالص و بكده هو مش بينتقم من المعيد بس لا ده بينتقم من الطالب كمان لان الورق ده غالبا بيكون ورق الكورس و أنت ما بتذاكرش غيره فبتلبس يا معلم و ياتنجح بالعافيه يا اما تشيل و عوضك على ربنا في فلوس الكورس و" اسأل مجرب و لا تسألش دكتور" , د كمان الدكتور بيتعمد يجيب سؤال قاله في المحاضرة في الامتحان علشان يعرف الطالب ده بيحضر المحاضرة و لا لأ ؟ .

المعيدين ماستسلموش للموضع ده قالك هي الدكاترة هتقطع عشنا و لا ايه ابتدوا يخبوا اجزاء مهمه من الورق و ينزلوها قبل الامتحان بيوم يعني ينزلك 8 او 10 ورقات مهمين وسط ملزمة المرجعة و يجيب واحد من الطلبه و يقوله أنا منزل ملزمة مراجعه مهمه جدا الكل يشتريها و الخبر يتذاع في الكلية و الدكتور طبعا حط الامتحان و ما ينفعش يغيره .

شكل الورق عامل ازاي ؟ .

طبعا المكتبات بتاعت كليات تجارة و أداب و حقوق بقة ليها أسامي و شهرة زي ( سندباد – كارفن ) و دي مكتبات جامعة عين شمس و على فكرة مبقتش مقتصره حولين الجامعه فقط لا بقى في منها فروع ممكن تلاقيها في مصر الجديده و مدينة السلام و عين شمس و ( مترو – حكاية – 4B ) في حلوان اشهر من نار على علم , في الكليات النظريه و ينضم معاهم طب بيعملوا الورق القاتم اوي يعني تلاقي الورقه حمرا اوي و زرقاء أوي بيحث أنها متتصورش و أنك لازم تشتريها لان تلاقي الملزمه 12 ورقه و ب 20 أو 25 جنية و ازياد بكتير و بيبقى المعيد هو اللي منزلها , أما بقى كليات العملي هندسة و علوم و حاسبات بكتفوا بأنهم يحطوا تفاحة , عنقود عنب , كمثرى في نص الورقه و باللون غامق جدا و الكلام اللي بيقى في قلبها مفقود و ده برضوا علشان متصورش الورق في أي حته و تشتريه من المكتبه .

الخط لو الورق مش ورق كورسات يعوض ربنا تحس ان الللي كاتب الورق طالب في 2 ابتدائي لسه بيتعلم الكتابة و يسلام لو الملزمة بالانجليزي كل الكلام الاسبلنج بتاعه غلط خالص .

النشاط لم يقتصر على الورق فقط !...

مش معقوله البحر بيحب الزياده برضوا بس يا سيدي المكتبة لازم تسعدك في الحصول على درجات أعمال السنة أزاي ؟ , أول ما الدكتور ينزل شيت على طول تلاقي الحل نزل في المكتبات و اللي بينزل الحل هو معيد الماده بس غالبا بيكون معيد ميديش كورسات و فاضي هو اللي بنزل الحل و مها كابرت و قلت مش هشتريه هتلاقي نفسه بتشتريه و تقول اهو مرجه اراجع منه بعد ما أخلص حل بنفسي .

و ده غير بيع كتب الدكاترة و الاداوت اللي بتحتجها في المعامل و الورش و الرسم و هكذا .

طالب حكومي سابق

أحمد صبري