ماذا سيحدث لو حكم التيار الديني مصر ؟

بعد ما شوفت مظاهرات النهارده في التحرير و الهتافات و الشعارات اللي كانت ماليه الميدان تخيلت كده لو حكم التيار الديني مصر هيعملوا ايه ؟

هيلغوا لبس البدل و الجينز و يقلوبها جلاليب و عقال و الله فكره على الاقل الجلابيه مريحه في الحر تخيل كده رايح انترفيوا و كاوي الجلابيه عند المكوكجي و شادد العقال فوق راسك و تخش على الامن و تقولوا السلام عليكم يا أخي عندي مقابله مع HR.

طبعا HR مش هيسألك أخبارك ايه في الانجليزي هيقولك أخبارك ايه في الفصحى ؟ و اكيد هيبقى اسمه المسؤل عن التنمية و الموارد البشرية .

مفيش عربيات جمال و حصانه و ده للأغنياء فقط أنما الفقراء يركب حمير و عربيات كاروا ( أهو برضوا نخف زحمة المرور ) .

تغير أسم مارينا للشيماء " منقوله من فيديوهات سارة ولا ايه " و سوف يتم تخصيص شهور مصيف للسيدات لوحدهم و الرجاله لوحدهم و تحريم المايوه نهائيا نزول البحر باجلاليب.

هنترحم اخيرا من بدي كارينا المقزز و الالوان العجيبه في التحجيبه للبنات و هيبقى النقاب الزي الرسمي للسيدات .

الغاء جميع القنوات الموجوده على النيل سات و الاكتفاء بقنوات الرحمه و الناس و الحكمة و قناة الاخوان الجديدة مصر 25 .

قطع العلاقات الدولية مع كل البلاد الاجنبيه و التعامل مع دول الخليج فقط لانها بقت بتدي المعونه بدل امريكا .

ممنوع دخول الشماريخ و الاعلام في مدرجات الاستاد و يسمح فقط برفع السيوف في المدراجات .

الغاء الاجازات الرسميه زي حرب اكتوبر و شم النسيم و عيد العمال و يحل محالها اجازات خروج قيادة الجماعات من المعتقل .

فرض على الرجاله يتجوزوا 4 وقد لقى هذا الطلب ترحيب شديد من الرجاله و مصمصه شفايف من السيدات .

عمل غزوة كل عام على أي بلد اروبي .

تخصيص 6 شهور في السنه للدراسه للرجاله و 6 الشهور الباقيه دراسه للسيدات حتى لا يجتمعوا مع بعض .

تغير اسم محطة السادات بأسم محطة عبود الزمر .

ارتداء منى الشاذلي النقاب كمحاوله منها للسماح لها بتقديم برنامج العاشرة مساء و ورفض كبير الجماعة .

تغير اسم الجرايد الحكومية الثلاثة من اخبار و اهرام و جمهورية الى القائد و المرشد و الخليفه.

الاعدام لكل ما تسول له نفسه نقض رئيس الجماعة سواء في سره او علانيه .

قطع النت في مصر لانه غير ضروري واعتبراه مكان يمارس فيه المحرمات .

منع البيبسي و الكوكاكولا من مصر و احل مكانهم كانز عرق سوس و تمر .

الغاء القهوة و الشاي و النسكافيه و الكابتشينو و يحل محالهم الينسون و الكارويه و الحلبه " ده على اساس ان احنا بنرضع او ولدين جديد ".

تغير اسم شوارع مصر عباس العقاد و مكرم عبيد و احمد فخري الى اسامي قادة الجماعات امثال طارق الزمر .

جعل سيتي ستارز متجر لبيع العبايات و النقاب و الجلاليب و السواك .

تعلن شركة المصرية للسيارات سابقا جمال حاليا عن توافر جمال و حصانه بالتقسيط و بدون مقدم .

أحمد صبري