كان نفسي أقبلك أعمل معاك حوار للتاريخ ،وأفضل شايل صورتي معاك لحد ما نتقابل أنا وأنت في الجنة ،أنت طول الوقت عايش معايا بأدوارك ،وكلامك اللي قلته فيها أنا حافظه ،حتى لما أتعمل فيك مقلب وقلت : مش كل اللي بيعوزا ده ( تشاور على القلب ) بيقدر ده ينفذه ( وتشاور على العقل ) مش كل اللي بنعوزه بيتحقق. صح يا خالد مش كل اللي بنعوزه بيتحقق ،وأنا كنت عايز أقبلك ومتحققش ده.
بس أنت عايش معايا دايماً في كل حالة في حياتي ،مش هقدر انسى "يوسف الصياد". الدور التاريخي بالنسبه لي. تعرف أن كنت كل ما أروح جرنال أو أي مكان لازم أرجع أكتب أول حاجة "يوسف الصياد". تعرف أن حتى الكلام اللي كان بيتقلك اتقالي ،فاكر لما قالك "إحنا ناخد الحوار ونقلب الاسئلة ونخلي اللي تحت فوق واللي فوق تحت ". اتقالي بالنص أول يوم روحت فيه جرنال ويومها برضو كتبت يوسف الصياد.
دايماً لما بروح مكان شغل جديد بقول جملتك اللي قلتها لكوثر " مش هدوم يا كوثر هتروح زي اللي قبلها". عشان أنت مش مستريح في المكان ،وأنا كمان مكنتش مستريح برضو في المكان بس رغم كده عملت زي ما أنت عملت في الدور وكنت بشتغل. حتى لما روحت جريدة حكومية وأنا برضو روحت مكان حكومي وحصلت لك مشكلة ،أنا كمان حصلي زيها.
بقالي شهر بقول كل يوم جملتك اللي قلتها لسكره ( هند صبري ) لما روحت لها البيت وفضلت سهران مستنيها لما ترجع وقلت لها "كل مره بتبعدي فيها عني يا سكره بتبقي عملتي مصيبة ،عملتي ايه يا سكره ". مش بقولك أن الدور عايش جوايا ،وهيفضل عايش حتى بتفصيله اللي كانت بره المهنه.
تعرف أن يوسف الصياد لازم احكي عنه لكل اللي أعرفهم ،لازم أذكره في أي مكان شغل ليا جديد ،لازم أسم يوسف الصياد يتكتب على مكان أروحه جديد ،لازم أقول جملتك "متابعة الملف أو القضية بعد النشر شيء مهم " . ولما كبرت شوية بقيت بقلدك وأقول زي ما كنت بتقول لما كنت رئيس تحرير " أنا مينفعش أرجع أشتغل حاجة أقل من المكان اللي كنت عليه". أو "الشغل ده يعملوا اي واحد لسه متخرج جديد".
تعرف أني مش بسمع أغنية "هو أنتي ليه بعيده كده " غير من التراك اللي فيه صوتك ،ومنة شلبي بتقولك "أنت مجنون " وأنت بتقولها "أه مجنون بيكي".
تعرف أني حبيت معاك الحب والعشق في سلطان الغرام ،كنت وقتها بمتحن وكان المسلسل بيتذاع على بانورما دراما الساعة 8 بالليل ،كنت لازم أسيب المذكره وأجي أتفرج عليه ،عشان أشوفك. تعرف أني لسه بسمع تتر المسلسل لحد دلوقتي. ولو اتعاد المسلسل بتفرج عليه ،ولو اتعاد مسلسل بعد الفراق لازم أتفرج عليه. أنت كنت حاله فريده من نوعها حاله خلتك توصف الحياة في جملة في مشهد ليك في فيلم "الريس عمر حرب ". وأنت بتقول : الناس نوعين .. نوع كل طموحه لقمه عيش وهما دول اتحطلهم القانون النوع التاني اصحاب الاحلام وهما اللي بيعملوا القانون لنفسهم.
ولخصت الحالة السياسية لما قلت : الشعب المصري كله ماسك في ديل الحكومه اكنها امه اللي خلفته حتي لو كانت الحكومه ماشيه على حل شعرها.
تعرف أن كل اللي كتبوا عنك النهارده نسوا جملة تاريخيه ليك في فيلم "فتح عنيك" وأنت بتقول : لو كنت ناوي تغير دورك تمد ايدك وتفتح الستاره الله أعلم هتشوف ايه وراء الكواليس بس ممكن اللى تشوفه يخليك ما ترجعش تشوف الدنيا زي ما كانت ولا تقدر تغمض عنيك.
الله يرحمك يا فنان.
