معاناة شاب معهوش واسطة بعد الثورة

كنت متخيل ان لما الثورة تقوم حال البلد هيتعدل، و تبقى ثورة على كل حاجة ... ثورة على الفساد والبطاله ... وأهم حاجة تبقى ثورة على الواسطة. 

أنا اعلم ان الثورة ليست عصا موسى السحرية اللي هتغير البلد في يوم و ليلة، ولكن كان عندي ايمان و يقين بإن حال الناس هيتعدل وكل واحد يراعي ربنا عشان عايز البلد تتغير، وإن كل صاحب شغل خلاص هيلغي من قاموسه كلمة "ده جاي من طرف مين ؟" وان الكل هيبقى متساوي 

.
وبعد ما تنحى مبارك والبورصة رجعت تشتغل تاني، وبدأت الحالة العامة تتحسن، رجعت تاني لرحلة البحث عن وظيفة ... وبدأت ادور في مواقع النت والأهرام والوسيط و كل خرم ابرة يعلن عن طلب مهندسين. وبعت السي في بتاعى وفضلت قاعد جنب التليفون مستني حد من دول يتصل بيا و يعبرني ... "بس تقريبا كل اصحاب الشركات خطوط تليفوناتهم كارت مش خط فالرصيد على طول خلصان". 

قلت اجرب طريقة تانية، أنزل بنفسي اطبع لي 30 أو 40 سي في كده و انزل ادور بنفسي على شغل في أكتر الاماكن اللي بيبقى فيها تجمع للمصانع والشركات ... زي المنطقة الحرة في مدينة نصر و العاشر من رمضان.

نزلت وفضلت ادور كعب داير على وظيفة تايهه يا ولاد الحلال، ولكن مفيش ... حتى الشركة اللي صاحبي لسه مقدم فيها امبارح، وعامل انترفيو، بس معاه كوسه، قالت لي مفيش وظايف .

قلت مبدهاش بقى و لازم اعمل حاجة ... كلمت صديق ليا يعمل داخل الشركة و قلت له : انا بدور على شغل و بسأل في الشركة عندك قالولي مش طالبين حد ... قالي ازاي ؟ ثواني وانزلك حالا ..

وعقبال ما شربت سيجارة نزل صديقي وأخد مني السي في وهو بيقولي: يا راجل فيه حد عايز يقدم على شغل من غير ما حد من جوه الشركة يقدم له السي في بنفسه !.

بعد يومين جالى أتصال هاتفي ..

- الو ... المهندس أحمد صبري، مع حضرتك تامر من شركة كذا (اللي صاحبي مقدم لي فيها) وكنت عايز أحدد مع حضرتك ميعاد عشان تيجي تعمل أنترفيو. لو حضرتك فاضي بكره يبقى الميعاد بكره الساعة 1 الظهر ان شاء الله.

- يا سلام يا سلام أنت تؤمر ... بكره من الساعة 12 هكون قدام باب الشركة مستني.

إتصلت بصديقي لكي اشكره و ابلغه بموعد الانترفيو بتاعي ... قالي: تمام جدا، بص بقى الواسطة اللي قدرت اجبهالك أني اقدملك السي في بتاعك و اخليك تمتحن في الشركة، إنما غير كده مش في مقدرتي ... يعنى محتاجة واسطة أكبر شوية عشان تعدي من الامتحان.

يا سلام !!! حتى الامتحانات والقعدة مع الـ HR بقى فيها وسايط ؟!! 

يعني أنا لو ساقط الواسطة تعديني، ولو نجحت ومعييش واسطة ممكن ما اشتغلش !! ده كفاية اسئلتهم اللي ملهاش اجابة ... دي أصعب من امتحان الفيزياء في الثانوية العامة !!

اسأل صديق لى يعمل فرد أمن في أحدى الشركات عن مصير السي في اللي بنقدمها في الشركات، لان أغلب الشركات اللي بياخد منك السي في يا بتاع الامن اللي على الباب أو في الريسبشن السكرتيرة بتاخده ..

رد وقال لي : اخر كل يوم، لو الشركة محتاجة موظفين بنبعتهم الادارة يبصوا فيهم .. إنما لو مش محتاجين حد بناخدهم معانا البيت العيال تذاكر في ضهرهم، أو المدام تطلع عليهم بطاطس ! او الرمي بقى و تريح الدماغ من الأول خالص !!!. 

كل أصدقائي اللي خلصوا معايا السنة دي اشتغلوا بوسايط، اللي باباه كان صاحب مهندس فاتح مكتب فأخده معاه، و اللي خاله شغال في شركة فأخده معاه ... وكلهم اشتغلوا بعد الثورة وبوسايط ..

ده غير بعض العروض طبعاً ... إني أدفع مثلاً فلوس لشخص عشان يشغلني ..

كمثال: واحد قال لي هات 30 الف جنية و انا اشغلك في ادراة الكهرباء !! ... ده على اساس أني معايا 30 الف و بدور على الشغل رفاهية مثلا. 

ده غير موضوع الخبرة، أصل جميع الشركات واعلانات الوظايف طالبة خبرة ... وأنا لسه حديث التخرج و قاعد في البيت، كبيري هاخد خبرة من مطبخ أمي اللي بقالي فترة بتعلم منها الطبيخ.

أنا أعلم انه يكفيني شرف المحاولة في البحث عن وظيفة، ولكن لا يكفيني هذا الشرف طول الوقت ... فأنا بعد ما بقيت شحط وخلصت، لسه باخد المصروف ... وده ماينفعش لاني محتاج فلوس، والفلوس بتيجي من الشغل، والشغل بيجي بالواسطة ..

وكل واسطة وأنتم طيبين.

أحمد صبري