عادات وطقوس مصريه في العيد

لكل شعب عاداته و تقاليده و خصوصا الشعب المصري اللي بيحافظ على عاداته و تقاليده من 7000 سنه و مش بيغيرها حتى لو قامت 100 ثورة و خصوصا في الاعياد بيبقى ليه طقوس خاصة منها الاتي :

·        قبل العيد بأسبوع تنضيف الشقة بالكامل كأننا كنا معفنين قبل العيد .

·        غسل السجاد و المشيات و كل حاجة تفرش في الأرض يأما في مغسله او في مدخل العماره و تغريق الشارع ميه بصابون ( دليل النظافة لكل عماره ) و عدم فرشها الا يوم الوقفه .

·        عمل الكحك و البسكاويت بكميات كبيره و توزيع اطباق منها على كل الجيران و كل جار لازم يرد الطبق فيه نفس الكميه من الكك اللي وصلولوا .

·        كل واحد يدوق كحك جاره و ينتقده بانه كان محتاج يخمر شوية , الدقيق وحش , الكربوناته كتيره في العجين و هكذا .

·        تحويش كميات كبيره من الأكل تكفي لاطعام دولة كامله بحجة ان البياعين بياخدوا اجازة العيد لمدة اسبوع ولازم البيت يبقى عمران .

·        زحام شديد على محلات اللب و السوداني و الشوكلاتات .

·        اغلاق جميع افران العيش في العيد .

·        امك تقولك لازم تلبس لبس جديد تنزل تصلي بيه عايز الناس تقول علينا عره و مجبالكش لبس جديد في العيد تصلي بيه حتى لو بقيت شحط و خلصت دراسة لازم تسمع الكلمتين دول .

·        لازم شيخ الجامع يوم صلاة العيد يفضل يقول في الميكرفون مفيش صلاة تحية مسجد احنا بنصلي في الشارع و محدش بيعبره و بيصلوا برضوا .

·        الستات لازم تسلم على بعضها على باب او سلالم الجامع و يحكوا لبعض هما خلصوا فرش الشقة امتى بعد حملة التنضيف الجماعية اللي قاموا بها .

·        الأمام في صلاة العيد يقول للمصلين التكبير في السر و عدم رفع الايد و كل اللي بيصلي وراه يكبر جهرا و يرفع ايده .

·        بعد الصلاه الاطفال لازم يمطروك بومب و صواريخ و يضربوا مسدس الخرز فيك .

·        التليفزيون يعرض اغنية صفاء أبو السعود العيد فرحه بأستمرار .

·        القنوات تعرض كلها نفس الفيلم في نفس اليوم و احيانا في نفس التوقيت .

·        كل قناة تجمع عدد لا بأس بيه من الفنانين يطلعوا يقولوا للناس كل سنة و أنتوا طيبين و عيد سعيد عليكوا .

·        ظهور عمرو مصطفى على أي قناة أو فيديو صغير على اليوتيوب لحرقة دمك بكلامه و خلاص .

·        لازم تقعد تدور في التليفزيون على مسرحيه العيال كبرت و مدرسة المشاغبين و الواد سيد الشغال .

·         زيارة الاقاريب او التعيد عليهم في التليفون حتى لو أنت مش بطقهم .

·        الخال أو العم لازم يزل العيل الصغير عشان يعطيه عديه و لازم ابوه يردها اكبر من ما هو دفعله .

·        السفر للبلد حتى لو أنت مش بتحبها .

·        زحف شديد من المناطق الشعبيه على المولات في مدينة نصر و السينمات .

·        امتلاء الول على الفيس بوك بكلمة عيد سعيد و كل سنة و أنت طيب .

·        عمل تاج ليك في صور بالونات عليها كل سنة و أنت طيب و صورة الدوش و مكتوب عليها نذكركم بمعاد استحمامكم اليومي .

·        كل صفحة لفنان أو اي موضوع على الفيس بوك تكتب هتقضوا العيد فين يا جماعة ؟ .

أحمد صبري