ميكروباص ابو اسماعيل
ببوستر ( 1 )
انتخابات الرئاسه عامله هوس للناس وطبعا
صور ابوسماعيل مغرقه كل العربيات . كنت
ماشى فى صلاح سالم و الطريق واقف وكان فيه واحد سلفى قاعد جنب السواق وراح فاتح
موضوع انتخابات الرئاسه وقال
السلفى: ربنا يولى من يصلح امرنا ويبقى
خير ومفيد للبلد دى عشان كده يا جماعه محتاجين ننصر شيخنا ابوسماعيل .
راكب 1 : بس ده خلاص مش هينزل عشان امه
امريكيه .
السلفى : دى مكيده مدبرها عليه العسكر
وامريكا و هو الاصلح والله يا جماعه .
راكب 2 : لا ياعم انا مش عايز ابقى
افغانستان بلا حازم ابو سماعيل بلا بتاع .
السلفى : والله انته فاهمين غلط موضوع
الشريعه ده هو فى حد يرفض يتحكم بالاسلام وبعدين عشان نطبق حد فيها لازم نجيب
اثباتات وادله الموضوع مش بسيط وكل واحد هياخد حقه وبعدين بقولك ابوسماعيل ليه
عشان هو الوحيد اللى مهتم بالفقراء والناس البسيطه اللى على قد حالها .
ست عجوزه :هو البرادعى هو اللى كان
قاعد فى امريكا وتلاقيه لبسهالوا .
قلت لنفسى " لا بقى انته ممكن
تغلطوا فى امريكا وفى ابوسماعيل وفى المجلس العسكرى ذات نفسه انتوا حرين انما
البرادعى نقطتين وتقطموا على طول "
انا : مالوا بس البرادعى يا حاجه
بابوسماعيل هو اللى سفرلوا امه عشان تاخد الجنسيه الامريكيه ليه كان داعيها على
عشاء فى افخم مطعم فى نيوريك ولا واشنطن .
السلفى : يا جماعه الراجل خلاص بره
السباق احنا دلوقتى بنتكلم على الراجل اللى هيحكمنا .
انا : طب انا عايز اعرف راى حضرتك لما تطلع
ام ابوسماعيل فعلا امريكيه ويطلع شيخك كداب .
السلفى : استغفر الله يا اخى متقولش
على الشيخ الجليل كده استغفر استغفر دى مؤامره والله وبعدين حتى لو معرفش يخرج من
المؤامره دى فا خيرت الشاطر موجود انا سمعت اتنين شيوخ بيقولوا انه اعلم منه كثير
فى السياسه .
راكب 2 : هو ليه الرئيس لازم يبقى تابع
لجماعه او سلفى شوفوا السلفيين عملوا ايه فى جنازة البابا شنوده رفضوا يقفوا دقيقه
حداد على الراجل .
السلفى : مفيش حاجه اسمها دقيقه حداد
دى بدعه .
انا : الرسول عليه الصلاة والسلام
عندما كان يمر جثمان رجل يهودى وقف عليه وقال الصحابه اتقف على يهودى يا رسول الله
قال انفس خلقها الله .
راكب 2 : شايف الكلام المحترم مش تقولى بدعه .
السلفى : والله يا جماعه ده فكرنا
واحنا بنعمل الخير عشان نقابل بيه ربنا ولما يسألنا عليكم نقول ان احنا تولينا
شئون اموركم .
ميكروباص ابو اسماعيل
بوسترين ( 2 )
كنت فى صلاح سالم وكان عمر سليمان رايح
بيقدم ورقه ومحشورين فى الطريق بقالنا ساعتين عشان خاطر انصاره مستنين البيه يجى
يقدم ورقه وفتح السواق الكلام .
السواق :عمر سليمان هيرشح نفسه .
راكب 1 : والله راجل محترم مش احسن من
اللى مش عارف جنسية امه ايه ، فى حد ميعرفش امه امريكيه ولا صعيديه ولا اسكندرنيه
ولا انجليزيه ؟ ازاى يعنى الكلام ده .
راكب 2 : والله انا خايف من الراجل
اللى اسمه عمر سليمان ده هيخلى الدنيا تولع تانى فى الشارع والواحد زهق الصراحه .
راكب 1 : بينى وبينك الواحد زهق
الصراحه مش عارف ينتخب مين بيقولك اللى اسمه حاجه كده فتوح قطرى تقريبا والراجل
ابو نضاره اللى لسه كان طالع على قناة الحياه اللى اسمه حاجه العو ده سودانى باين
ولا سورى وعمور موسى فرنساوى والشاطر بتاع الاخوان حبسجى هو وايمن نور كده فاضل
مين عشان ننتخبه .
انا : خالدعلى .
راكب 1 : مين البتاع اللى بتقول عليه
ده كمان معرفوش .
راكب 2 : كان نفسى ابو تريكه ينزل
الانتخابات .
راكب 1 : والله راجل ميه ميه وزى الفل
محترم تخيل كان عايزين باين يخدوه فى لجنة وضع الدستور وهو رفض و كانوا عايزين
يمسكوا مش عارف منصب ايه كده فى النادى الاهلى ورفض اللى قال الكلام ده وائل جمعه
.
انا : مع احترامى وحبى الشديد
لابوتريكه يعرف ايه فى السياسه وبعدين هو اصلا مش بيحب السياسه .
راكب 3 : بالظبط كده عليه العوض ومنه
العوض فى البلد .
راكب 1 : بيقولوا احمد شفيق راجل برنس وهيظبط البلد
ولانه فى واحد قالى مره ان الراجل ده كان مبارك ظلمه لانه مكنش بيحبه .
راكب 2 : لا اعتقد انهم بيقولوا حمدين
كويس بس مش عارف ليه ياخى مش بينزلى من زور .
راكب 1 : والله زى ما بقولك كده هو
الجدع اللى اسمه عمرسليمان ده عشان هو لو مش راجل كويس كان يقبل يبقى نائب رئيس فى
ظروف المنيله بتاعة الثوره دى ولا لما مبارك اتجنن وسبلوا البلد وراح شرم الشيخ
وهو ضحك عليه وتنحى بداله ولبسه فى الحيط او البرنس أحمد شفيق .
راكب 2 : بص هى لو فيها غرامه هنزل ادى
صوتى لاى حد زى ما تيجي انما لو عادى مش هنزل اقعد مع العيال و امهم فى البيت اولى
وهو الاسم فى الشغل واقف في طبور الانتخابات .
راكب 1 : تصدق بالله انا فى انتخابات
البرلمان لما قالوا ان فى غرامه مرضتش انزل عشان مبحبش حد يلوى ايدى انا انزل
بيكفى ومش غصب عنى .
فاصل ميكروباصى : كرامات
بوسترات ابو سماعيل .
لو حطيت بوستر ابوسماعيل على ظهر
ميكروباصك هيحصلك كالاتى
1- لو الطريق زحمه وواقف ومش بيتحرك
ميكروباصك هيطير .
2- لو دخلت بالميكروباص الموقف هتحمل
اول واحد من غير ما تستنى دورك .
3- فى البنزينه فى تانك مخصوص
لميكروباصات ابو سماعيل .
4- بوستر ابوسماعيل بيدلك على الشوارع
الفاضيه .
5- مفيش زبون يقدر يضحك عليك فى لاجره
لان بوستر ابوسماعيل بيخلى الزبون اللى مدفعش الاجرة يقلب نور .
6- لو البنزين بتاع عربيتك فضى ومش
لاقى بنزينه عليها بوستر ابوسماعيل على الطريق حط مايه وهتتحول بنزين على طول .
7- لو عربيتك موديل قديم بعد حط بوستر
ابوسماعيل عليها هتتحول موديل السنه دى .
8- مفيش ظابط شرطه هيقدر يوقفك ويقولك الرخص
طالما حاطط صورة ابوسماعيل .
9- لو نازل من بيتك متأخر افرد بوستر
ابوسماعيل وطير بيه لاقرب ميكروباص عليه بوستر ابوسماعيل .
10- لو عربيتك صينى او اى ماركه بعد
وضع بوستر ابوسماعيل بتتحول على طول لعربيه امريكى .
أحمد صبري
ليست هناك تعليقات:
إرسال تعليق