دكتور نجاد البرعي : إحنا عندنا معارضة تحب أن تعيش في ظل الحاكم .

حوار دكتور نجاد البرعي في مجلة إحنا عدد سبتمبر

ايه هو المجتمع المدني ؟ .

الفكرة أن لما المجتمعات بتتطور , بيتطور دور الناس داخل المجتمع . زمان كان الناس لازم تعمل اعمال خيرية و كان الوقف عندنا اسمه الوقف الخيري , فأصبح المجتمع الخيري . و بعد كده تطور دور الناس بدل ما كانت بتبني جوامع و مستشفيات و اعمال تدخل بيها الجنة , الى أعمال تخدم المجتمع زي معهد الموسيقى العربية و الجمعيات الجغرافيا و جامعة القاهرة ,  فأصبح اسمه المجتمع الأهلي  . ثم تطور الى المجتمع المدني فأصبح بيعمل تنمية سياسية و تنمة ثقافية و تنمية اجتماعية . 

 http://e7namagazine.blogspot.com/2012/09/blog-post_25.html

جولة في برامج الدعاة الجدد !*

 بحب اتابع البرامج الدينة اللي بتيجي في التليفزيون من زمان جداً . كنت بتفرج على برنامج الشيخ الشعراوي بعد صلاة الجمعة و برنامج عبد الله شحاتة اللي كان بيجي على التلفزيون الأرضي يوم الاثنين الساعة 10 بالليل . مرورا بكل برامج عمرو خالد اللي عملها على مدار تاريخة الدعوي . 

و لقاءات محمود سعد و الشيخ خالد الجندي . حتى البرامج اللي بتعملها دريم  زي برنامج الدكتور محمد هداية لحد برنامج الموعظة الحسنة بتاع مبروك عطية ( اه وربنا اتفرجت على مبروك عطية اللي بيطلع بورده و عود ريحان في البرنامج ) و مش بس لما طلع على دريم لا ده لما كان بيعمل برنامج على قناة عين بتاعة ART  زمان و كنت بتفرج عليه . 

متبعتي للبرامج الدينية كون عندي فكرة عن كل داعي ديني و  طريقتة في التقديم و معلوماتة و كمان ابتديت ادور و اقرا في الكتب و معتمدش على أن يكون مصدر معلوماتي هما بس . لكن في رمضان السنة دي لفت نظري 3 برامج . 

البرنامج الأول برنامج عمر صانه حضارة لعمرو خالد . البرنامج ده حلو  و تابعتة كله بس توقفني اسلوب عمرو خالد في تقديم البرنامج . لان عمرو متغيرش اسلوبة من وقت ما ابتدا , هو اسلوب واحد و نفس الاسئلة اللي بيسألها كل سنة  زي " يا شباب يا ولاد و يا بنات عملتوا ايه للاسلام لما توقفوا قدام ايد ربنا هتقولوا عملتوا ايه لدينك ؟ " .

لكن عمرو من كتر حماسة في البرنامج تحولت طريقة كلامة الى طريقة ردح . كمان انتقالة بين بلدان كتير  و تغير مكان التصوير لمحاولة تخيل المشاهدين المكان اللي يحكية عنه , ادى الى توهان المشاهدين لانه بيرجع لنفس المكان اكتر من مره .

عمرو خالد بيحب يقدم برامجه بشكل درامي و اعتقد أن في حد بيكتب له سيناريو للحلقة عشان يقول الكلام مظبوط بس ده بيخليه  يقول معلومات غلط و ممكن عمرو يغير كلامة من برنامج الى أخر  . و اتذكر برنامج عمرو خالد قصص القرأن كان بيقول معلومات خاطئة ينفيها الشبخ خالد الجندي في البرنامج الذي يليه .

البرنامج التاني " ثورة على النفس " لمعز مسعود . معز لما ابتدا طريق البرامج الدعاوية ابتدا ببرنامج على قناة اقرأ و  كان بيقدمه بالانجليزي . و كنت اتمنى أن يسمتر في تقديم برامجه بالانجليزي بدل ما يفعله في برامجة الأن .

معز بيتكلم في برنامجه عن الالحاد و لكن معز  اعتقد أن بس اللي عندهم شك في ايمانهم و عندهم تذبذب هما الطبقة الغنية بس طبقة الـ A  class . لانه بيكلمهم على نظريات دراون و بيتكلم بالانجليزي . و بيضرب مثال بكتاب اجانب و بيقول اغاني اجنية  . فبيخلي اللي بيتابعه يتوه منه لانه مش فاهم .

الضيوف اللى استضافهم معز اغلبهم فنانين و مذيعين و مطربين و تكلم معاهم عن فكرة برنامجه .  مع انه لو كان نزل الشارع و سأل الناس العادية كان هيبقى افيد بكتير . 

معز  عنده مشكلة هو كمان في الانتقال من مكان الى مكان . و ده لانه طول الوقت بيتكلم عن دروان و نظرية الالحاد , مع العلم أن فيه كتاب لمصطفى محمود اسمه رحلتي من الشك للايمان و بـ 6 جنية كان ممكن يسهل لمعز كتير في برنامج بدل ما يعقد الامور بنظرية دراون و اكتشاف الكون . 

ده غير انه بيركز مع كاميرا واحده بس طول الوقت و لو اتاخد بزاوية تانية بيبان ودنه و جانبة , مع انه داعية  ديني لازم الناس تشوف كل حواسه و هو بيتكلم عنيه و تعبيرات وشة و مخارج الحروف .

معز  لو عمل البرنامج ده بالاجنبي و اتذاع على قنوات اجنبية كان هيبقى هايل و يساعد في تحسين صورة الاسلام في الغرب .

برنامج " سحر الدنيا " لمصطفى حسني . و ده بقى عليه علامات استفهام  كتيره , سواء كبرنامج و لا مصطفى حسني نفسه .

مصطفى حسني شخص سلفي ذكوري متشدد الفكر  , و لكن للاسف محسب على التيار الوسطي المعتدل . يمكن عشان بيحب يلبس كاجول و مودرن ليبقى قريب من الشباب .

 دائماً بيحصر كلامه عن المرأه في الحجاب و طريقة اللبس , لدرجة انه في احدى برامجه على قناة أقرأ جاب مليكان و وقفهم و قعد يشرح عليهم بالعصايا مفاتن المرأه في كل لبس ! , و أن جسمها فيه أماكن فتنة يجب سترها !. و في برنامجة السنة دي قال أنه مينفعش البنت تحط صورتها على الفيس بوك و حد يقولها أنتي جميلة . 

بيحاول يقرب في اسلوبة من عمرو خالد ,  لدرجة أنه بيسأل نفس اسئلة عمرو خالد , زي لما تقابل ربنا يوم القيامة هتقولوا ايه ؟! و يا شباب و يا بنات متخبوش حاجة على اهلكم و متعملوش حاجة من وراهم . 

في البرنامج بتاعه سحر الدنيا هو بيتكلم فيه عن الزهد من الفلوس و الحياة , الزهد اللي بيتكلم عنه مصطفى جعله يصور البرنامج في قصور تركيا  ! . و كأن بيقول للناس ازهدوا انتوا و أنا هستمتع لوحدي . و في حلقة بيتكلم عن زهد الحياة و الطبيعة مصورها في جنينة و مبنى أثري جميل في تركيا يخليك تسيب البرنامج و تتفرج على الخلفية اللي وراه . 

مع العلم أن مصطفى في برنامجه  بيقول أن المفتون بالدنيا كمسحور له أعراض. ولسحره وقاية وعلاج . فهل لم يجد مصطفى الدواء لنفسه قبل أن يصور برنامجه ؟! .

*نشر في مجلة إحنا عدد سبتمبر 2012