( 27 )
ستات الميكروباص أنواع فيوجد الشابه و العجوزة و المتوسطة العمر و حتى البنات الاطفال ما الميكروباص بيلم كل الناس وفي يوم كنت راكب الميكروباص ومروح و الدنيا حر أوي و قاعد أنا و اخويا في الكنيه بتاعت الميكروباص الكبير و طلعت ست كبيرة في السن حاجة (45 سنة كده ) و دي طلعت الميكروباص و مصممه انها تقعد بيني و بين اخويا ( مش عارف محرم يعني و لا ايه ؟! ده حتى ولد مش بنت ) يا حاجة ما تتفضلي تقعدي ما الكنبة فاضيه و دي ابدا تقولي لا أنا نازله قريب و عايزة اقعد هنا , يا ستي يهديكي يرضيكي و دي ابدا طلبت في دماغها أنها لازم تقعد مكاني , رحت سايب مكاني و واخد اخويا جنبي و قلت لها اتفضلي يا حاجة اقعدي جوه لوحدك ؟؟ , قالت لى لا أنا عايزة أقعد هنا في النص ( مش عارف كانت طالبه معاها قلت أدب و لا ايه ؟ ) المهم سبتلها الميكروباص أنا و أخويا خالص و نزلنا علشان تقعد الحاجة برحتها .
" يارب تكوني ارتحتي في الكنبة و لقيتي اتنين تقعدي بنهم في النص و تكوني مرتاحة ".
( 28 )
لما ببقى راجع متأخر بعد الساعة 12 بالليل و راكب ميكروباص أول حاجة أعملها أني أتشاهد و أدعي ربنا أني أرجع بيتنا سليم لانك مش ضامن السواق حالته عامله أزاي و في يوم كنت راجع من جسر السويس و السواق جايب 2 صحابة و قاعدين في الكورسي اللي جنبه و عمالين يلفوا سجاير و يشربوا حشيش و عادي خالص و الناس اللي في الميكروباص اللي نايم و اللي الأمر بالنسباله عادي و التباع كل شوية يزعق مع نفسه و يقول أنا مبرشم محدش يكلمني و أصلا مفيش حد بيكلمه بس تقريبا هو بيهلوس .
" شرب الحشيش ده مزاج بس للي يقدروا " .
( 29 )
كنت راجع من حلوان و قاعد في الكنبة الأخيرة و جت ست كبيرة أوي في السن من حظي النحس قاعدة جنبي و فضلت بقى طول الطريق استغفر الله العظيم , اوف , لو سمحت ايدك و أنت بتطلع الأجرة الصراحة عصبيتني جدا و خلتني عايز اقوم ارميها من الشباك لاني قاعد في حالي و دي محسساني أني قاعد جنب هيفاء وهبي مش واحده اكبر من جديتي اللي ماتت كمان.
" عزيزتي السيدة العجوزة برجاء الانتباه لسن سيادتكم و عدم مضايقة الرجل المحترم اللي قاعد جنبكم اللي هو أنا ".
( 30 )
بعد السيدات العواجيز خش بقى على المنقبات يا وقعتك السوداء لو وحده منقبة جت قاعدة جنب منك تلاقيها اول ما تقعد تجيب جميع الشنط اللي معاها و ممكن لو مكفتش تلم الشنط اللي موجوده في الميكروباص علشان تحطها فاصل ما بينكم , و هي بتديك الأجرة تحسسك أنك جربان و معفن و البكتريا بتتنطط من وشك لانها بتمسك الفلوس بترطيف صوابعها و هي قرفانه و عماله تقول استغفر الله العظيم من كل ذنب عظيم , لو هي اللي قاعدة في الكرسي اللي جوه مش اللي بره و حبيت تنزل لازم من سعاتك أنك تقوم و ترجع 3 متر وراء لحد ما توصل اخر الميكروباص و على اللي واقفين في الطرقه بتاعتة الميكروباص أنهم ينزلوا من الميكروباص لحد ما الأخت الفاضلة تنزل .
" السيادة المنقبة الدين يسر و ليس عسر و حرام تطهقي حد هو طهقان لوحده من العيشة علشان أنتي تركبي و لا تقعدي ".
فاصل ميكروباصي : أشهر جمل مكتوبة على ظهر الميكروباص ......3
- بحب الناس و بكره كلامهم .
- أنا أسف يا مريم .
- يا بخت من طلع صحبه راجل .
- يامحشحشين يكفيكوا شر الكمين .
- ادعوا معايا .. اللهم ابعد عنى المرور .
- الحب كدة .
- البرنس طاهر .
- طريق السلامة يا أبو شكوكو .
- أنا زى ما أنا .
- الغيرة حيرة .
- مسير الزمان يتغير .
- يا صغير على الجراح .
- الأدب زينة الرجال .
- و لا يهمنى .. مادام ربنا بيحبنى .
- تعبت خلاص .. من عيون الناس .
- جديد × جديد .. كله تبع التقليد .
- يا تهدى .. يا تعدى .
- الحنش .
- الصحوبية أمانة .. مش غدر و خيانة .
- بيحسدوني عليكي وانت سر عذابي .
- دى قصه كفاح مش جايه على المرتاح .
- ما تزمروش يا بهايم دا السواق نايم .
- القلب الطيب اوس اوس .
- يا ناس سيبونى اسدد ديونى .
- الحلوه دى من امبابه وموكله الغلابه .
أحمد صبري
ليست هناك تعليقات:
إرسال تعليق