الانجليزي ماليش فيه !.

أنا عندي عقده من اللغات و بالذات الانجليزي و الفرنساوي طول عمري بكرهم مالوا العربي  . و ربنا مسلط عليه شوية عيال صحابي رخمين قاعدين لي بالمرصاد و لا كأنهم مصححين لغة . واحيانا بتبقى قاعدات السمر الليله على القهوة تريقة على بعض نطقي للكلمات " كده أنا فضحت نفسي رسمي " .

 فكرت كتير أحسن نفسي في الانجليزي و قول عيب يا واد د أنت مش هتشتغل غير بيه بس كل محاولاتي فشلت رحت أخدت كورس في الاجامعة الامريكيه علشان أحسن نفسي و دخلت امتحان تحديد المستوى و و لقيت البنت الأموره اللي قاعده بتقولي حضرتك هتبدأ من Level 6  و النبي يا حاجة و أنا مش هبدأ من Level 1  . لا حضرتك مستواك وصلك لـ 6 على طول لو أنت تحب تنزل لمستوى معين قول ؟؟ . لا و أنا أنزل ليه على أقل أزل العيال شوية أنا مش ضعيف خالص أهو في اللغه و دفعت الفلوس . بدأ الكورس و أنا بقى منتظم فيه من قبل معادي بنص ساعة حاضر و جايب شنطة فيها كشكول سلك  و الكتب بتاعتي ( ملتزم .. ملتزم ) و بدأ الكورس و كانت الصدمة ايه ده د نفس نظام المدرسة الأعدادي و الثانوي شوية كلمات على كام شرح قواعد و خلاص على كده !!. ايه ده يا عم أنا مش متفق على كده د أنت قولت هطلع من الجامعة الامريكية زي مساري بتاع لبنان كده .

كلمت الدكتورة اللي بتديني الكورس و قلت لها يا دكتورة أنا عايز أتعلم مش نافع كده أنا عايز الأنجليزي بتاعي يبقى أقوى من العربي . قالت لي بس يا بني أنت هنا معايا تتعلم القواعد و فيه كورس تاني تتعلم منه المحادثة و ده هيخليك تتكلم انجليزي كويس .

أنا : و ده هيخليني زي مساري ؟ .

الدكتوره : مين مساري ده ؟؟.

أنا : لا متاخديش في بالك ده مطرب كنت بشوفه في استار اكاديمي أيام ما كنت لسه تافه .

كلمت مدرس انجليزي صحبي من أيام ثانوي و قلت له بس بقى أنا في ورطة و عايز اتعلم لغه علشان أعرف أتنيل أشتغل في البلد دي أو أهج منها أهم حاجة أتعلم الأنجليزي  ده و حكيتلو على تجربتي مع الجامعة الأمريكية  .

المدرس : لالالا كل ده بيزنس و أنت حلك عندي كورس المعهد القوات المسلحة !! ( اللي بيروحو امة لا اله الا الله علشان ياخدوا فيه كورسات هناك ) .

أنا : طب حضرتك ده كويس و لا مقلب زي الجامعة الأمريكية كده .

المدرس : عيب عليك د أنا اللي بدرس هناك .

( يا فرحت طنط بحضرتك يا مستر يعني بيزنس بس لحساب حضرتك المره دي ) , " أنا : شكرا يا مستر هفكر في المعهد ده و كلمك على طول ".

قلت مبدهاش أنا لازم أعرف العيب في مين ؟؟ و بعد عقد جلسات مع جماعة صحابي " غير اللي بيتريقوا عليا طبعا  و أكتشفت أنهم بيعانوا زي بالظبط و مطلعتش أنا لوحدي . قلت أكيد العيب في التعليم أه و الله أنا  أفتكر أيام المدرسة كان مدرس الأنجليزي أهم حاجة عنده أنا 44 طالب في الفصل لازم ياخد عندوا درس مع العلم أني كنت في مدرسة خاصة و بدفع مصاريف 1500 جنية من غير الباص  ( د ايام ما كنت أنا في ابتدائي كانوا مبلغ برضوا ) و في إعداي أتذكر مستر منكوش اللي كان على طول عمره ما سرح شعره ابدا و لا شرح درس كان بيدخل يحل el work book  و يمشي و شكرا على كده و السنة اللي بعدها كان المدرس بينطق كالاتي انكول  و بروبورتوز  و كلام كتير و لا و كان ده مدرس أول المادة في المدرسة ( اللي عايز يعرف أسم المدرسة يقولي و أنا ابعتلوا اسمها على طول حرصا على مستوى الأجيال القادمة ) .

و لما دخلت ثانوي في اولى ثانوي كان المدرس بيخش ينام طول الحصة أو يناقش القضاية الطالبه و كانت تتمثل في انتوا ليه بتيجوا المدرسة ؟؟ . و في تانية ثانوي مدرس الفصل كان بيحب يتسلطن شوية فبيطلع ولد عندنا في الفصل يغني شوية أغاني شعبية و هو يقعد مبسوط أوي و يتكيف أو الحديث عن الجنس . و مدرس الدرس كان أهم حاجة أحفظ 500 كلمة اللي في الملزمة و سمعهم كل حصة و الصراحة أنا كنت بحفظ شوية و واحده كنت صاحبتها في المجموعة كانت بتغششني الباقي .

و دخلت الجامعة و لقيت كل دراسة انجليزي و أنا مش عارف حاجة و بقيت ماشي الخمس سنين ببركة دعا الوالدين و كمان سألت المعيدين قالي بس يا بني دي مصطلحات هندسية و هتتعود عليها خلال دراستك إنما أنك تاخد كورس فا مش هيفيدك .

زداد تفكيري عمقً و قلت لنفس أكيد برضوا في سبب وراثي مش معقوله العيال اللي بينطقوا نص الكلام عربي و الباقي إنجليزي ده جاي من فراغ اكيد ورثوه عن أبوهم أو امهم . طب أنا أعمل ايه دلوقتي أعرف منين أن ابويا ضعيف في الأنجليزي ؟؟ أقولوا وريني شهاداتك يا بابا من أيام ابتدائي لحد ما خلصت تعليم اكيد لا طبعا ليخاف ليكون سقطت مره في الانجليزي وكمان عيب الراجل بعد ما كبر  و وصل للستين يفضح نفسه قدام ابنه و ماما اكيد هتقولي انها نيست كل ورقها في بيتها لما اتجوزت بابا " حجج أهلي " يالا ما علينا المسامح كريم .