( 24 )
احيانا كتير بتصادف لما أركب الميكروباص يبقى فيها واحده حامل ويسلام لو أول مره حمل بقى بيبقى جوزها ميت من الخوف و كل شوية ينادي على السواق ( يا اسطى بعد أذنك الجماعة حامل هدي شوية السرعة او خد المطبات على مهلك مش عارف ليه بيقول على مراته جماعة ما يقول المدام حامل عجبي على الناس دي !! ) و مع كل خبطة او أي حاجة في العربية يطلع الاستاذ ده يزعق يا اسطى ارجوك , انا بقى بزهق الصراحة لاني ببقى متأخر و عايز أوصل مشواري و ده كل شوية يزعق و تلاقي نصايح السادة الركاب نازلة ترف " يا بني بص أنت تلاكب في الكرسي اللي جنب السواق و ده مش غلط عليها " , واحد تاني " بص حاول متخرجهاش الأيام دي كتير لحد ما الحمل يثبت أنا كنت زيك كده " و هكذا ناس فتاية تموت و تتكلم .
" عزيزي الشاب مش علشان أنت و المدام بتتشاقو بالليل ميطلعش على دماغي أنا الصبح " .
( 25 )
كنت راجع أنا و اصحابي ولاد و بنات من الكلية و ركبين الميكروباص و بتكلم مع البنات عن الحجاب و النقاب و أن طالما المجتمع سامح للبنات بالمايوه يبقى لازم يسمح بالنقاب و ده مش معناه اني موافق على النقاب بالعكس أنا ضده و كذالك البنات و اذا واحد من السادة الركاب يتطوع و يتدخل في الحوار ( غتاته يعني ) و يقول لا النقاب غلط و حرام دول مسكوا ولد كان بيتنكر بالنقاب و يدخل بيه المدينة الجامعية للبنات و كمان مسكوا راجل كان هربان متنكر بالنقاب و فضل يعد مساوء النقاب و أنا احاول أقنع فيه أن احنا بنتنقاش مع بعض صحاب يعني أطلع أنت منها , أبدا مصمم اللى يتكلم و الله سبته و نزلت و هو لسه بيتكلم .
" عزيزي الراكب لو سمحت خليك في حالك بلاش تخش في حديث حد هو أنا كنت أدخلتلك في حاجة , أرفع شعار أنت مالك علشان اللي بيتدخل فيما لا يعنيه يسمع ما لا يرضيه " .
( 26 )
كنت ركب الميكروباص و راجع من الكلية و الميكروباص ماشي على الدائري و السواق ماشي بسرعة جنونية و عمال ياخد الطريق سبعات في تمانيات و يرخم على عربيات النقل اللي مينفعش حد يهزر معاها اصلا , و رغم صيحات كل الركاب بأنه يهدي أبدا مش راضي لحد ما ما كان هيموتنا فعلا و هو نازل من على الدائري و ساعتها الركاب كلهم قاموا عليه قومة رجل واحد , اللي استفزني أوي انه بيقول في ايه يا جماعة لو متنا هنموت شهداء !!!. و بعدين العمر واحد و الرب واحد .
" عزيزي الساق لو سمحت متخدش الدين على هوالك و تفسره على مزاجك و احترم نفسك وراعي أن معاك بني أدمين في العربية ".
قاموس لغة السواقين و التباعين للاماكن اللي موجوده في مصر :
طريه طريه = مطرية
ماظه ماظه = الماظه
عيود عيود = عبود
مسكا مسكا = الف مسكن
بيت العيله = القسم اللي موجود في المكان
ربسيس ربسيس = رمسيس
تحير تحير = تحرير
هيزه هيزه = جيزة
عايب عايب = عرب
أحمد صبري
