شماعة الثورة المضادة

حصل الفترة اللي فاتت احداث كتيره اوي زي ما معودنا سنة 2011 كده كل يوم حاجة جديدة بس أبرزها نزول الجماهير في استاد القاهرة اثناء مبارة الأفريقي التونسي و الزمالك بالشوم و السلاح الابيض و تكسير الاستاد و ضرب الحكم و لعيبة الفريق التونسي و طلع كل ده ثورة مضاده , التانية مقتل مصمم الأزياء محمد داغر في شقة و طلع ده برضوا ثورة مضاده و قابليها أحداث كتير أوي كانت برضوا ثورة مضاده حلو اوي كده اقف بقى شوية كده هنا عشان كلمة ثورة مضادة دي بتفكرني بكلمة ماس كهربائي - مختل عقليا من أيام النظام السابق لما كانت تبقى حريقة يبقى ماس جريمة قتل مختل , حادثة قطر يبقى جاموسة فعلا كان نظام في منتهى التنظيم في تحليل الحوادث .

نرجع تاني لثورة المضادة عشان أنا كده بعت عنها بس كل خوفي تبقى الثورة المضاده الشماعة اللي بنعلق عليها اخطأنا و تصرفتنا يعني حادثة الماتش محدش ينكر أن عندنا تخلف و تعصب جامد أوي في الكورة و أن الكورة دي كنا بنولع في بعض و بنخاصم بعض بالشهور بسببها و كانت هي كل حياتنا و كل كلمنا قبل الثورة , و في حوادث كتير أوي بيدل على الشغب زي ما الالترس قبل كده كسر استاد كرة السلة في النادي الأهلي و الخناقات اللي بتحصل بعد ماتش الأهلي و الزمالك و كل ده فجأه عايز تقنعني انه اختفى من عندنا ؟.

لا طبعا الأخلاق مازلت زي ما هي , لسه المتعصب للكرة متعصب زي ما هو و اخرها كنت في ميكروباص واحد قال اللي عمل كده جمهور الأهلي عشان مش عايزنا نلعب معاه في البطولة , و مازال اللي بيكسر اشارة بيكسرها برضوا يمكن كان الأول بيخاف من عسكري واقف ياخد نمرة العربية انما دلوقت ماشي في الشارع كانوا بتاع الحج الوالد لسه وارثة عنوا و قالوا اتفسح فيه شوية , و لسه اللي بعاكس بيعاكس و لسه و لسه و لسه حاجات كتير مش هتتغير في يوم و ليله و أن مصر بعد 25 يناير مش هتجيب شعب تاني يعيش فيها و يبقى مع الشعب الجديد ده فلول الحزب الوطني و النظام السابق يضايقوا الشعب المصري الجديد و يولعوا فيه و يبوظولوا ماتش و يكسروا اشارة و يقتلوا مصمم ازياء و ينزلهم كام راجل بدقن يطلقون عليهم شيوخ دين عشان يثيروا فتنه بين الشعب .

لازم نبص للمشكلة و نتعامل معاها بشكل جدي و حلها من جذورها لو فضلنا نزوقها و نبروزها بشوية اسامي و نديها مسكنات مش هنخلص اه في ثورة مضاده بينفذها ناس من بقايا النظام ليهم مصلحة في ان البلد تفضل خراب و ان محدش يجي نحيتهم بس مش كلهم ثورة مضادة يعني بقايا الحزب الوطني و النظام السابق محلقوش دقنهم من يوم 25 يناير و فجأه نازلوا الشارع بأسم السلفين لهدم الأضرحه او اثارة الزعر بين الناس أنما فيه مشكلة حقيقية اسمها السلفين عاملين زعر و قلق بين الناس , برضوا مش فلول النظام شايفه ان داغر كان ضدهم من اول يوم يمكن كان هو الأدمن بتاع خالد سعيد و أنا معرفش فقراروا يقتلوه و يبقى مقتله ثورة مضادة .

مفهوم الثورة المضادة بالنسبالي هو اي حاجة تعوق حركة بناء البلد سواء بقى كانوا فلول أو افراد من الشعب نفسه , و مواجهة أي مشكلة هو أول اسباب حل المشكلة أنما الهروب منها مش هيجيب نتيجة و تفضل الثورة المضادة جنب أخوتها الماس الكهربائي و المختل عقليا و المزيد قادم .

أحمد صبري

من أنتم .. من أنتم يا من تتكلمون عن الشيوخ ؟

الفترة الأخيرة و خصوصا بعد سقوط النظام و استفتاء الدستور انتشرت فيديوهات كتيره لمجموعة من الشيوخ امثال محمد حسين يعقوب يأمر الناس بالتصويت بنعم و أن الدين انتصر بكلمة نعم و وصف الاستفتاء بالغزوة و كأن المواطن اللي رايح يدلي بصوته بدل ما يمسك قلم في ايده لا ماسك سيف و داخل يدبح الناس و القاضي من أجل الفوز بالصندوق و نصرة الدين و طالب الاخوة اللي قالوا لا أنهم يتفضلوا يطلعوا بره البلد لان دي مش بلدهم , و انتشر أخيرا فيديو للأخ خالد شومان يشرح فيه معنى ليبراليه و علمانية و مدنية و يقول دولة ليبرالية يعني ايه يعني أمك انت ... ايوه امك انت ... متلبس حجاب !!! ده كان معنى ليبرالية و معنى مدنية ان الناس مش هتعبد ربنا و مفيش رجالة خالص !!. " متشكرين و الله يا شيخ على المعلومات القيمة دي أوي مش عارف من غيرك أنا ممكن كنت وديت البلد فين . كل ده كوم و الكوم التاني بقى الناس اللي بتدافع عن هذا النوع من الشيوخ و الدعاية و تلاقي كومنتات عندك على الفيس بوك مثلا من نوعية أنت علماني و كافر و بتغلط في رموز الدين و علمائة و أنت مين عشان تحكم على الشيخ ده او تتكلم عليه ؟ كل هذا من نوعية هذه الاسئلة قررت اني اجوب عنها في البوست ده برأي و دماغي و ديني اللي أنا اعرفوا و مقتنع بيه .

أنت مين عشان تتكلم عن شيخ و لا تحكم عليه و لا اصلا تتكلم في الدين ؟.

أنا واحد ربنا ميزة عن سائر مخلوقاته بنعمة العقل عشان أفكر و اميز بيها مش علشان اسلمها لشيخ معرفش العلم اللي عندوا ده جابوا منين , ثانيا ربنا أمرني في جميع اياته استخدام العقل عندما قال أفلا تتدبرون , افلا تعقلون , افلا تتذكرون يا أولي الالباب .

بس الشيخ ده عندوا علم اكتر منك و مش منحقك تعارضوا ؟ .

و أنت عرفت منين أنه عندوا علم أكتر مني و أنت اصلا متعصب ليه و لرأيه و بتغلط في جميع الشيوخ التانين و مبتسمعش غيروا و كمان التكليف نزل من ربنا بـ أقرا و ليس بأسمع , أزاي اثق في شيخ و هو بيكذب الواقع و يسب الناس و مش مقتنع بالعلم و لا يحترم أحد من العلماء .

بس ده يعرف ربنا أكتر منك و كمان رمز و عالم نفتخر بيه ؟

و مين اللي قال انه يعرف ربنا أكتر مني هو أنت اللي بتسجل لي و تسجلوا عند ربنا و لا أنت اطلعت على الغيب . طب ايه هي انجازته عشان افتخر بيه و بعدين ما البرادعي و زويل رموز أكتر منه و واحد زي شومان سبهم و قذف بيهم المحصانات أزاي اقول على ده رمز او راجل ديني و هو أصلا بيخرب عقول الناس و يدمرها .

أنت ليه بتهاجم السلفين و الأخوان ؟

أنا مسلم معرفش أن الاسلام فيه سلفي و اخواني و شيعي و صوفي و سني و كل الكلام ده و لما بهاجم حد مببقاش متعمد حد معين , لان أي حد يقول حاجة غلط انا ببقى ضده على طول .

أنت عايز تحول مصر من دولة اسلامية الى دولة علمانية ؟

لا يا سيدي مصر طول عمرها دولة اسلامية و بتتسرق و تتنهب و محدش في مجموعة الشيوخ اللي بيتكلموا دلوقتي قال حاجة ؟!, أنا مش عايز نخلط الدين بالسياسة ملقيش شيخ جامع بيحشد الناس و يقولهم قولوا نعم لكي تدخلوا الجنة و اللي يقول لا هيخش النار و كل ده من أجل مصلحة شخصية ليه , محدش يقلب الانتخابات من حرية رأي لنصرة دين طب أنا أرضي ذمتك ينفع حد يستفتي على دينك ؟ , اكيد لا طبعا يبقى أزاي قلبنا الاستفتاء لغزوة و نصرة أنا عايز نفصل الدين عن السياسة وتبقى كلمة الشيخ الشعراوي العنوان بتاعنا " اتمنى ان يصل الدين الى رجال السياسة و لا يصل رجل الدين الى السياسة " . الرسول كان عندما ياخد أمر في شيء دنيوي يسأل الصحابة و دائما يقول و أمركم شورى بينكم و أنتم ادرى بشؤن دنياكم .

الشيوخ دول أكتر ناس اتظلموا و أمن الدولة بهدلهم ؟

و الله كلنا اتبهدلنا من أمن الدولة و ماحدش تقريبا من الشعب مكنش ليه ملف فيها و بعدين ازاي اتبدهلوا و هما كانت قناوتهم شغاله و عمالين يمجدوا و يعظموا في النظام السابق و يلهوا الناس في سموم و فتاوى من عينة يا شيخ التاتو حرام و لا حلال و عمل الحواجب حرام و لا حلال ؟! , طب أنا فرحي بعد يومين ينفع أصبغ خصلتين من الشعر باللون الفحلوقي و لا الفحلوقي حرام لانه من الوان جهنم !, أو يفتي أحد الشيوخ بأن الصحابة كانوا بيشربوا بول النبي و لا فتوى أرضاع الكبير و أكيد أنت عارف الباقي . أنا أعرف أن رجل الدين لا يخشى مع الله لومة لائم او أي حد بالعكس ده يقول الحق و لو على رقبته , أنما هما اقتصروا الدين بين الحلال و الحرام و نسوا يعلموا الناس مبادىء و قيم الدين زي العدل و الكرم و التسامح و الفضيلة و الأخلاق و الشرف و الامانة و أصبح شغلهم الشغال تكفير فلان و الفتي في الموضوع الفلاني و الكلام عن امجادهم و شخصيتهم .

تقريبا أنا كده جوبت عن معظم الاسئلة و الاتهامت اللي كانت شغاله على دماغي بسبب خلافي مع شيوخ الفضائيات و الجوامع و أخر حاجة اختم بيها

" اغاية الدين أن تحفوا شواربكم يا امة ضحكت من جهلها الأمم "

أحمد صبري

يا ميكروبصاتك يا مصر الجزء التاسع : ثورة داخل الميكروباص .

( 30 )

كنت في مصر الجديدة و كانت لسه الاحداث مشتعله و مبارك متنحاش , شاورت لميكروباص كان ماشي في نص الشارع راح راكن على جنب و وقف عشان اركب قلت يمكن خاف من الظابط اللي واقف فسألته : غريبة يا اسطى اول مره سواق اشورلوا يقف على جنب مش يقف في نص الشارع و يروح فاتح الباب و يقولي أركب ده عشان الظابط ؟ , قالي : لا طبعا الظابط ده اخره علقه , انما ده احتراما للناس اللي في التحرير , انتابتني سعاده بالغه و قلت الحمد لله في أمل في الناس و لكن لم تدوم سعادتي طويلا و اذا بسواق يكسر اشارة مرور و يشتم سواق العربية الملاكي اللي جنبه , يا اسطى حرام عليك مش انت لسه قايل انك بتحترم الناس اللي في التحرير ايه اللي حصلك كسرت الاشارة ليه و شتمت الراجل و هو مش غلطان ؟ , قالي : يا باشا اكل العيش مفيهوش احترام لحد و بعدين الاشارة دي محطوته غلط , و هناك ايقنت ان احنا في حاجة لمظاهرة مليونيه لضرب سواقين المكيروبصات عشان يغيروا أفكارهم و يعرفوا الصح من الغلط .

" سواقين الميكروبصات من الناس اللي محتاجه عمره في ادماغهم و حياتهم و لازم يتعاد النظر في رخصهم . "

( 31 )

الفتي اهم ما يميز الشعب لقد تحول الشعب من 85 مليون خبير كروي لـ 85 مليون خبير سياسي , كنت راكب الميكروباص سواق الميكروباص شاف واحد ماشي عاكسي فقال بصوت عالي يا جماعة انا دمي بيتحرق لما بقيت بشوف حد بيعمل حاجة غلط " مفرحتش زي المره اللي فاتت لاني خلاص اتعلمت " الواحد نفسه يصلح البلد دي بجد مش عايزين نبقى في نفس الاقرف اللي كنا فيه ايام اللي ما يتسمى ده , راح واحد من الميكروباص تقريبا كان بيتظاهر عند جامع مصطفى محمود يا اسطى متقولش كده عليه ده كان قائد عظيم و كفاية انه معملش فيك زي القذافي و طلع راجل و احسن منك و سلم البلد للجيش , راح واحد تاني مدخل ما عمل كده عشان احنا كنا نايمله في الشارع و لم معملش كده كنا هنكسر بيته على دماغه , راح الراجل قالوا : طب تعرف ان هو في حرب اكتوبر حفظ دم شهداء كتير ؟ , " ينتابني الفضول الشديد لمعرفه ازاي وفر مبارك دم الشهداء في الحرب ؟ و اتدخل سائلا الراجل : أزاي يا حج ؟ , قالي : كان الاوامر بتقول ان 5 مليون جندي ينزلوا قناة السويس و الدبابات تعدي على راسهم لولا مبارك و ذكائه طار بالطيارة بتاعته و ضرب الاسرائلين كانت الناس دي كلها ماتت . يا نهار اسود و منيل الراجل ده جاب معلوماته السودا دي منين ايه الهبل ده ؟ و الاسود بقى ان ست قاعدة في الميكروباص تقول اه والله كان راجل ابن حلال و محافظ على البلد . الحمد لله تتدخل العنايه الالهيه و تنقذي بأني انزل من الميكروباص .

" عزيزي الراكب الفتي ضار جدا بالصحه و يؤدي اللى وفاة الركاب اللي حوليك ."

( 32 )

القرف ميزة يمتاز بيها السواقين الميكروباص و بشدة بخلاف رمي تفل الشاي من الشبك و اي حاجة في ايديهم من الشباك و على العربيات اللي حوليهم كل ده بقى كوم و اللي حصل معايا امبارح حاجة تانية خالص , كنت راكب الميكروباص و السواق حاطط علم مصر قدامه و فرحان بيه قوي و اذا بسواق عطس و راح ساحب علم مصر من قدامه و نافف فيه , يا اسطى حرام عليك في حد ينف في علم مصر ؟ , يقولي معلش يا استاذ الجو برد و انا واخد برد و مش معايا مناديل . يا اسطى اي علبة مناديل بـ 2.5 من اي اشارة تكفيك شهر مش تنف في علم مصر ده رمز للبلد يعني ينفع انا امسك وشك دلوقتي و انف و اتف عليه ؟ . يقولي لا يا استاذ حرام و محدش يقدر يعمل في وشي كده , اهو علم مصر زي وشك بالظبط حرام و مينفعش حد يعمل فيه كده , يقولي انت محبكه اوي كده ليه طب اوعدك اول ما اروح هغسله و انشره و لا اقولك و لا تذعل نفسك خالص هجيب واحد غيره و متزعلش نفسك معلش هي العطسه ملهاش كبير و بعدين مش احسن ما كنت عطست في هدومي , ايقنت اني لو استمريت معاه في الحديث لا هو هيفهم و لا هيبطل قرف لحد ما أنا ارجع في الميكروباص من كم القرف بتاعه .

" عزيزي السائق العلم رمز وشرف للبلد مش للنف و العطس و مسح الايد . "

فاصل ميكروباصي ............. مظاهر الثورة داخل الميكروباص .

- أختفاء الأغاني الشعبية و الاعتماد على الأغاني الوطنية.

- انتشار استكير 25 ي ن ا ي ر بدل أرقام العربيات .

- انتشار استيكر مصر بدلنا نحبها و نحميها .

- تعليق شعار مصر غاليه عليا .

- السواق يكتب على ظهر الميكروباص : الاسطى محمود ينعي أسر شهادء الثورة .

- السواق يكتب على ظهر الميكروباص : أرجعي يا شرطة مش عارف اهرب من حد غيرك .

- انتشار شعار أرفعك رأسك أنت مصري .

- السواق يعلق في الميكروباص صورته و هو في ميادن التحرير .

- السواق و الركاب يتحدثون دائما في السياسية .

- تعليق صور الشهداء داخل الميكروباص .

- غلاء الاجرة ربع جنية .

- تعليق علم مصر في الميكروباص و تحديد على التابلو .

- السواق لابس استيك في شعره علم مصر .

أحمد صبري

الأتش أر المدمر

بعد ما خلصت كلية الفقعه الكبير الهندسة و بدات رحلة البحث عن وظيفة ابتديت اتصدم بـ الأتش أر و يفضل بقى يسأل و يفقع في مرارتي بسألها ملهاش اجابة اصلا و ليكم احد المقابلات مع الـ الأتش أر بس الاجابة في الاسئلة اللي هجاوب عليها هتبقى هي الاجابة اللي بيبقى نفسي اقولهالوا و هو قاعد قدامي

هو : أزيك يا أحمد عرف نفسك ؟

أنا : ما السي في بتاعي قدامك اهوا و انت بقالك ساعة بتقرا فيه مع أن كله يتقري في دقيقة .

هو : كلمني عن مشروع تخرجك ؟

أنا : و انت تعرف ايه عن مشروعي يا طعم أنت يا جميل , حضرتك تعرف حاجة عن الهندسية قبل كده ؟

هو : ندمت على ايه في حياتك ؟

أنا : اكيد أني دخلت هندسة

هو : و ايه اكبر انجاز عملتوا في حياتك ؟

أنا : أني اتخرجت منها و أنا لسه بصحتي ما جليش شلل و بقدر امشي على رجلي .

هو : شايف نفسك ايه كمان 5 سنين ؟

أنا : شايف نفسي واقف أنا و أنت قدام القاضي علشان ينظر في الدعوى اللي رفعتها عليك بسبب الاضرار النفسيه اللي سببتهالي بسبب اسألتك

هو : ايه التغير اللي حصل في حياتك و فرحت بيه قوي ؟

أنا : ان الاهلي رجع جوزية تاني

هو : و ايه التغير اللي حصل و مكنتش عايزه يحصل ؟

أنا :لما ماما بتعملي اكل جديد من برنامج الشيف حسن بتاع قناة الحياة

هو : طب قولي 13 * 15 بكام ؟

أنا : حمرا

هو : نفسك تعمل ايه في حياتك ؟

أنا : نفسي اعمل اعتصام ضد الأتش أر

هو : أحمد احنا متشكرين على وقتك جدا و ان شاء الله لو فيه نصيب هنكلمك تيجي تعمل انترفيوا تاني .

أنا : شكرا يا ورك يا كبير

أحمد صبري